НИШАСТИ МАТБУОТӢ. Раёсати Кумитаи бехатарии озуқавории вилояти Хатлон ба 520 намуна шаҳодатномаи сифати тухмӣ дод

ДУШАНБЕ, 28.07.2026 /АМИТ «Ховар»/. Раёсати Кумитаи бехатарии озуқавории вилояти Хатлон дар шаш моҳи соли 2026  613 намунаи тухмиро аз озмоиш гузаронида, ба 520 намуна шаҳодатномаи сифати тухмӣ додааст. Дар ин хусус 27 июл зимни нишасти матбуотии ин ниҳод ба хабарнигорон иттилоъ дода шуд.

Дар шаш моҳи якуми соли 2026 аз ҷониби мутахассисони Раёсати Кумитаи бехатарии озуқавории вилояти Хатлон ба шахсони ҳуқуқӣ ва воқеие, ки ба парваришу фурӯши ниҳолҳо машғуланд, 146 шаҳодатномаи мушаххаскунандаи навъи ниҳол барои 730 000 бех ниҳол дода шуд. Инчунин 1716,85 гектар кишти тухмӣ аз назорат гузаронида шудааст.

Дар нишасти матбуотӣ иттилоъ дода шуд, ки давоми шашмоҳаи якуми соли 2026 дар асоси санҷишҳои гузаронида бо сабабҳои ба талаботи санитарию байторӣ ҷавобгӯ набудан 10 735 дона тухм, 3486 килограмм шир ва маҳсулоти ширӣ, 10197 килограмм маҳсулоти гӯштӣ, 1211,3 килограмм равған, 473,2 килограмм моҳӣ, 221 килограмм асал, 40 980 килограмм меваю сабзавот ва 7415 килограмм маҳсулоти полезӣ аз фурӯш боздошт ва нобуд карда шуд.

Назорат ва таъмини иҷрои талаботи байторию санитарӣ, аз ҷумла истеҳсол, коркард, интиқол, нигоҳдорӣ ва фурӯши маҳсулоти чорвою паранда аз ҷониби мутахассисони соҳа тибқи талабот ба роҳ монда шудааст.

АКС: АМИТ «Ховар»