НИШАСТИ МАТБУОТӢ. Соли равон дар Мастчоҳ, Исфара ва Хуҷанд биноҳои нави тандурустӣ мавриди истифода қарор дода шуданд

ДУШАНБЕ, 08.07.2026 /АМИТ «Ховар»/. Соли равон бо иштироки Президенти мамлакат муҳтарам Эмомалӣ Раҳмон биноҳои нави тандурустӣ дар ноҳияи Мастчоҳ, шаҳрҳои Исфара ва Хуҷанд мавриди истифода қарор дода шуданд. Дар ин хусус имрӯз зимни нишасти матбуотии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ дода шуд.

Дар нишаст ҳамчунин изҳор гардид, ки дар шаш моҳи соли равон аз ҳисоби ҳамаи сарчашмаҳо 41 муассисаи тиббӣ сохта шуд, ки аз ин 31 ададро муассисаҳои кумаки аввалияи тиббию санитарӣ (КАТС), 6 ададро муассисаҳои госпиталӣ ва 4 –тои дигарро муассисаҳои хусусӣ ташкил медиҳанд. Дар 92 муассисаи соҳа корҳои сохтмонӣ идома доранд.

«Аз 92 муассисаи тиббӣ, ки айни замон дар онҳо корҳои сохтмонӣ идома доранд, 65 адаро муассисаҳои КАТС, 20 ададро муассисаҳои госпиталӣ ва 7 –тои дигарро муассисаҳои хусусӣ ташкил медиҳанд»,-шарҳ доданд дар нишаст.

Гуфта шуд, ки дар давраи ҳисоботӣ 55 муассисаҳо (39 муассисаҳои КАТС ва 16 муассисаҳои госпиталӣ) таъмир гардида, дар 111 муассиса (62 адад муассисаҳои КАТС, 43 адад муассисаҳои госпиталӣ ва 6 адад муассисаҳои хусусӣ) корҳои таъмирӣ идома доранд.

АКС: АМИТ «Ховар»