НИШАСТИ МАТБУОТӢ. «Тоҷикфилм» истеҳсоли се филми пурраметражи ҳунариро ба анҷом расонид
ДУШАНБЕ, 10.07.2026 /АМИТ «Ховар»/. Дар шашмоҳаи якуми соли 2026 Муассисаи давлатии «Тоҷикфилм» истеҳсоли се филми пурраметражи ҳунариро пурра ба анҷом расонид. Ҳамзамон тибқи нақшаи тасдиқшуда таҳияи лоиҳаҳои нави кинематографӣ ва истеҳсоли силсилафилми бисёрсериягӣ идома дорад. Дар ин хусус имрӯз зимни нишасти матбуотӣ директори ин муассиса Маҳмадсаид Шоҳиён ба хабарнигорон иттилоъ дод.
Иброз гардид, ки яке аз дастовардҳои давраи ҳисоботӣ анҷоми истеҳсоли филми ҳунарии «Ошёни меҳр» мебошад. Ин филм бори аввал дар кинои миллӣ ба меҳнати созандаи мардуми Тоҷикистон дар бунёди яке аз бузургтарин иншооти стратегии мамлакат бахшида шуда, мавзуъҳои ватандӯстӣ, ваҳдати миллӣ, пайванди наслҳо, меҳнати созанда ва масъулияти шаҳрвандиро дар назди ояндаи кишвар инъикос менамояд.
Ҳамчунин истеҳсоли филми ҳунарии «Моҳӣ барои Черчилл» бо коргардонии Нигина Раҳматова ба анҷом расид. Филм бар пояи рӯйдодҳои таърихӣ таҳия гардида, ба қаҳрамонӣ, шуҷоат ва фидокории намояндагони халқи тоҷик дар солҳои Ҷанги дуюми ҷаҳон бахшида шудааст. Дар он саҳми фарзандони Тоҷикистон дар таъмини ғалаба ва аҳамияти ҳифзи хотираи таърихӣ барои тарбияи ватандӯстии насли ҷавон бозтоб ёфтааст.
Филми ҳунарии «Решаҳо» бо коргардонии Абдулҳай Зокиров пурра анҷом ёфта, нахустнамоиши он рӯзҳои наздик баргузор мегардад. Филм аз саргузашти ҷавони русе қисса мекунад, ки баъд аз солҳои зиёд ба Тоҷикистон бармегардад, то решаҳои худро ёфта, робитаи худро бо гузашта барқарор намояд ва Тоҷикистони имрӯзаро аз нав кашф кунад. Дар филм мавзуъҳои сулҳ, инсондӯстӣ, ҳамдигарфаҳмии байни миллатҳо ва эҳтиром ба хотираи таърихӣ инъикос шудаанд.
Иттилоъ дода шуд, ки корҳои истеҳсолии силсилафилми бисёрсерягии «Хуршеду моҳ» таҳти коргардонии Манзаралӣ Шералӣ идома доранд.
Таъкид шуд, ки Муассисаи давлатии «Тоҷикфилм» зимни фаъолият ба офаридани филмҳое афзалият медиҳад, ки ба таърихи халқи тоҷик, ташаккули давлатдорӣ, ҳифзи арзишҳои миллӣ, тарбияи ватандӯстии ҷавонон ва муаррифии дастовардҳои муосири Ҷумҳурии Тоҷикистон бахшида шудаанд.
Моҳинави НАВРӮЗ,
АМИТ «Ховар»
АКС: АМИТ «Ховар»
НИШАСТИ МАТБУОТӢ. Кумитаи забон ва истилоҳот фаъолияти 75 ташкилотро мавриди санҷиш қарор дод
Филми ҳунарии «Моҳӣ дар шаст» дар кинофестивали байналмилалии Ярослав соҳиби се ҷоиза шуд
Бо мақсади муаррифии васеи Тоҷикистон як зумра филмҳои мустанад ба забони англисӣ тарҷума ва дубляж гардиданд
Дар Душанбе Рӯзҳои фарҳанги шаҳрҳои Истаравшан, Норак ва ноҳияҳои Фархор, Носири Хусрав, Ёвон, Мастчоҳ ва Дӯстӣ доир мегарданд
«Харитаи хатсайри Шӯриши Восеъ» ба ҷалби бештари сайёҳони дохилию хориҷӣ мусоидат менамояд
Корҳои тармиму барқарорсозӣ дар ёдгориҳои Қалъаи Муъминобод, Қалъаи Кӯлоб ва қасри Ҳокими Ҳисор идома доранд
Дар Бадахшон даври вилоятии Озмуни ҷумҳуриявии «Тоҷикистон — Ватани азизи ман» ҷамъбаст гардид
Бо иштироки олимони бостоншинос филми мустанади «Хутали қадим» таҳия гардид
Дар Тоҷикистон 6 агентии иттилоотӣ, аз ин 1 давлатӣ ва 5 мустақил фаъолият доранд
НИШАСТИ МАТБУОТӢ. «Шоҳи қуллаҳо» — филми мустанад дар мавзуи ҳифзи бабри барфӣ сазовори ҷоиза гардид
Ба истиқболи 35-солагии Истиқлоли давлатӣ бинои беназир дар минтақа — Театри миллии Тоҷикистон ба истифода дода мешавад
