НИШАСТИ МАТБУОТӢ. Тоҷикистон бо шарикони рушд 17 созишномаи қарзию грантӣ ба имзо расонид

ДУШАНБЕ, 28.07.2026 /АМИТ «Ховар»/. Соли равон Тоҷикистон бо шарикони рушд 17 созишномаи қарзию грантиро барои татбиқи 14 лоиҳаи сармоягузории давлатӣ ба маблағи умумии 386,9 миллион доллари амрикоӣ ба имзо расонид. Тавре Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода имрӯз дар нишасти матбуотӣ ба хабарнигорон иттилоъ дод, созишномаҳои қарзию грантӣ барои татбиқи лоиҳаҳои сармоягузорӣ дар соҳаҳои нақлиёт, энергетика, сайёҳӣ, маориф, тандурустӣ, ирригатсия ва кишоварзӣ ба имзо расонида шудаанд.

Гуфта шуд, ки дар ин давра маҷмуи лоиҳаҳои сармоягузории давлатии амалкунанда дар Ҷумҳурии Тоҷикистон 89 ададро ташкил дод, ки аз он 55 лоиҳа грантӣ, 5 лоиҳа қарзӣ ва 29 лоиҳа дар ҳаммаблағгузории қарз ва грант мебошанд. Маблағи умумии ин лоиҳаҳо 52,2 миллиард сомонӣ ё 5 миллиарду 633,8 миллион доллари амрикоиро ташкил медиҳад.

Дар доираи лоиҳаҳои сармоягузории давлатии амалкунанда азхудкунии маблағҳо барои хариди мол, иҷрои кор ва хизматрасонӣ аз санаи оғози татбиқ 3,37 миллиард доллар ё 60 фоиз ва тибқи нақшаи молиявии моҳҳои январ-июни соли 2026 4,5 миллиард сомонӣ (491,8 миллион доллар) ё 113 фоизро ташкил медиҳад.

Марзия САИДЗОДА,
АМИТ «Ховар»

АКС: АМИТ «Ховар»