Оид ба омодасозии мутахассисони соҳаи кӯҳкорию металлургия форуми ҷумҳуриявӣ баргузор гардид

ДУШАНБЕ, 27.07.2026 /АМИТ «Ховар»/. Бахшида ба 35-солагии Истиқлолияти давлатии Ҷумҳурии Тоҷикистон дар Донишкадаи кӯҳию металлургии Тоҷикистон таҳти унвони «Омодасозии мутахассисони соҳаи кӯҳкорию металлургия: мушкилот ва дурнамо» форуми ҷумҳуриявӣ доир шуд.

Тавре ба АМИТ «Ховар» аз Вазорати маориф ва илми Ҷумҳурии Тоҷикистон хабар доданд, дар форум иштирокчиён бо намоиши маҳсулоти соҳаи кӯҳкорию металлургӣ шинос гардиданд. Дар намоиш намунаҳои гуногуни маҳсулоти корхонаҳои саноатӣ, дастовардҳои истеҳсолӣ ва имконоти мавҷудаи соҳа ба маърази тамошо гузошта шуданд.

Дар ҷараёни форум масъалаҳои мутобиқ намудани низоми омодасозии кадрҳои муҳандисию техникӣ ба талаботи корхонаҳои истеҳсолӣ, банақшагирии қабули донишҷӯён бо назардошти эҳтиёҷоти соҳа, таъсиси ихтисосҳои нав ва такмили мазмуну муҳтавои барномаҳои таълимӣ баррасӣ гардид.

Иброз шуд, ки дар даврони соҳибистиқлолӣ барои рушди соҳаи саноат, бунёди корхонаҳои нави истеҳсолӣ, истихроҷ ва коркарди ашёи хоми ватанӣ, инчунин истеҳсоли маҳсулоти ниҳоӣ заминаҳои мусоид фароҳам оварда шудаанд. Дар ин замина таъмини корхонаҳои саноатӣ бо мутахассисони соҳибкасб яке аз масъалаҳои муҳими соҳа арзёбӣ гардид.

Иштирокчиён оид ба таҷрибаомӯзии донишҷӯён дар корхонаҳо, конҳо, озмоишгоҳҳо ва коргоҳҳои истеҳсолӣ, инчунин такмили таҷрибаи касбии омӯзгорони ихтисосҳои муҳандисию техникӣ мубодилаи афкор намуданд.

Таъкид гардид, ки нақши корхонаҳои саноатӣ дар омодасозии кадрҳо, ташкили пойгоҳҳои таҷрибаомӯзӣ, истифодаи озмоишгоҳҳо ва имконияти техникии корхонаҳо дар раванди таълим аҳамияти калон дорад. Ҳамкории муассисаҳои таълимӣ ва корхонаҳои истеҳсолӣ ҳамчун омили муҳими ташаккули малакаҳои касбии донишҷӯён арзёбӣ гардид.

Инчунин фаъолияти Донишкадаи кӯҳию металлургии Тоҷикистон дар самти ҳамгироии маориф, илм ва истеҳсолот, татбиқи барномаҳои муосири таълимӣ, рушди озмоишгоҳҳои соҳавӣ, таҳқиқоти илмии амалӣ, таҳсили дуалӣ ва бозомӯзии кормандони корхонаҳо муаррифӣ карда шуд.

Форуми ҷумҳуриявӣ барои табодули таҷриба, муаррифии имконоти муассисаҳои таълимӣ, илмӣ ва корхонаҳои саноатӣ, баррасии масъалаҳои соҳавӣ ва таҳкими ҳамкории илму маориф бо истеҳсолот заминаи мусоид фароҳам овард.

Дар анҷоми форум байни Донишкадаи кӯҳию металлургии Тоҷикистон ва Ҷамъияти саҳомии «Комбинати металлургии Тоҷик» созишномаи ҳамкорӣ ба имзо расид. Созишнома самтҳои омодасозии кадрҳои соҳаи кӯҳкорӣ ва металлургия, табодули таҷриба, рушди таҳсили дуалӣ, ташкили таҷрибаомӯзии истеҳсолии донишҷӯён ва густариши ҳамкории муассисаи таълимиро бо корхонаи истеҳсолӣ дар бар мегирад.

Тавре Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни боздид аз сохтмони корхонаи ғанигардонии маъдани оҳани Ҷамъияти саҳомии «Комбинати металлургии Тоҷик» дар ноҳияи Бобоҷон Ғафуров таъкид намуданд, «бунёди ин корхона оғози марҳалаи нави рушди саноати маъдан ва ташаккули металлургияи миллии Тоҷикистон ба ҳисоб меравад».

АКС: Вазорати маориф ва илми Ҷумҳурии Тоҷикистон