Ҳоким Холиқзода бо Сафири нави Арабистони Саудӣ дурнамои ҳамкориро баррасӣ намуд

ДУШАНБЕ, 08.07.2026 /АМИТ «Ховар»/. 7 июл муовини якуми Сарвазири Ҷумҳурии Тоҷикистон Ҳоким Холиқзода бо Сафири навтаъйини Фавқулода ва Мухтори Подшоҳии Арабистони Саудӣ дар Ҷумҳурии Тоҷикистон Холид ибни Абдуллоҳ Аш—Шамронӣ  мулоқот намуд, хабар медиҳад АМИТ «Ховар».

Зимни вохӯрӣ ҷонибҳо аз раванди рушди муносибатҳои дӯстона ва ҳамкории мутақобилан судманди Тоҷикистону Арабистони Саудӣ изҳори қаноатмандӣ намуда, зарурати андешидани тадбирҳои иловагиро барои тавсеаи минбаъдаи онҳо таъкид карданд.

Дар мулоқот гуфта шуд, ки Тоҷикистон ва Арабистони Саудӣ ба таҳким ва густариши ҳамкорӣ дар бахшҳои иқтисод, тиҷорат ва сармоягузорӣ таваҷҷуҳи хосса зоҳир намуда, барои рушди минбаъдаи онҳо талоши муштарак доранд.

Таъкид гардид, ки ҳамкории иқтисодӣ яке аз самтҳои афзалиятноки муносибатҳои ду давлат ба ҳисоб рафта, фаъолияти Комиссияи муштараки байниҳукуматии Ҷумҳурии Тоҷикистон ва Подшоҳии Арабистони Саудӣ оид ба ҳамкории иқтисодӣ, тиҷоратӣ, илмӣ ва техникӣ, инчунин баргузории мизҳои мудаввари соҳибкорон ва сармоягузорони ду давлат дар ин раванд аҳамияти муҳим дорад.

Иброз гардид, ки айни замон рӯзномаи ҳамкории Тоҷикистону Арабистони Саудӣ соҳаҳои иқтисоду тиҷорат, молия ва сармоягузорӣ, саноати сабук, энергетика ва об, коркарди маҳсулоти кишоварзӣ, сайёҳӣ, илму маориф, технология, фарҳанг ва амниятро фаро мегирад.

Ҷонибҳо иброз доштанд, ки иқтидорҳои молиявӣ ва технологии Арабистони Саудӣ ва захираҳои табиӣ ва меҳнатии Тоҷикистон барои ба роҳ мондани ҳамкории дарозмуддат ва судманд дар бахшҳои воқеии иқтисодиёт заминаи мусоид фароҳам меоранд.

АКС: АМИТ «Ховар»