«ПОМИРИНВЕСТ-2026». Байни Мақомоти иҷроияи ҳокимияти давлатии шаҳри Хоруғ ва соҳибкорон 22 созишномаи ҳамкорӣ ба имзо расид

ДУШАНБЕ, 25.07.2026 /АМИТ «Ховар»/. Тавре қаблан иттилоъ додем, 24 июл дар шаҳри Хоруғи Вилояти Мухтори Кӯҳистони Бадахшон Форуми байналмилалии сармоягузории «Помиринвест-2026» баргузор гардид, ки дар он намояндагони корпусҳои дипломатии муқими Тоҷикистон, соҳибкорону сармоягузорони ватанию хориҷӣ, шарикони рушд ва масъулони мақомоти давлатӣ иштирок намуданд.

Тавре ба АМИТ «Ховар» аз Мақомоти иҷроияи ҳокимияти давлатии шаҳри Хоруғ хабар доданд, дар доираи форум байни мақомоти шаҳр ва соҳибкорон 22 созишномаи ҳамкорӣ ба имзо расид. Ҳаҷми умумии сармоягузории пешбинишуда 181 миллион сомониро ташкил медиҳад.

Созишномаҳои баимзорасида ба татбиқи лоиҳаҳои муҳими иҷтимоӣ ва иқтисодӣ, рушди соҳибкорӣ, саноат, сайёҳӣ, инфрасохтор ва беҳтар намудани фазои сармоягузорӣ дар шаҳри Хоруғ равона гардидаанд.

Ин иқдом қадами муҳим дар роҳи ҷалби сармоя, таъсиси ҷойи нави кор, густариши фаъолияти бахши хусусӣ ва баланд бардоштани имконияти иқтисодии шаҳр арзёбӣ мешавад.

Шаҳри Хоруғ бо истифода аз имконоти мавҷуда метавонад ба яке аз марказҳои муҳими сармоягузорӣ ва рушди соҳибкорӣ дар минтақа табдил ёбад.

АКС: Мақомоти иҷроияи ҳокимияти давлатии шаҳри Хоруғ