Раиси Кумитаи миллӣ оид ба ҳуқуқи инсони Давлати Қатар дар Осорхонаи миллӣ бо тамаддуни тоҷикон шинос гардид

ДУШАНБЕ, 02.07.2026 /АМИТ «Ховар»/. Имрӯз Раиси Кумитаи миллӣ оид ба ҳуқуқи инсони Давлати Қатар хонум Марям бинт Абдулла Ал-Аттия ҳамроҳ бо ҳайати расмии худ, ки бо сафари корӣ дар Ҷумҳурии Тоҷикистон қарор дорад, бо мақсади шиносоӣ бо таърих, фарҳанг, тамаддун ва мероси ғании халқи тоҷик Осорхонаи миллии Тоҷикистонро тамошо намуданд. Дар ин хусус АМИТ «Ховар» бо истинод ба Осорхонаи миллии Тоҷикистон иттилоъ медиҳад.

Ҳайати меҳмонон аз толорҳои намоишии осорхона дидан намуда, бо нигораҳои нодир, бозёфтҳои арзишманди бостоншиносӣ, намунаҳои барҷастаи мероси таърихию фарҳангӣ ва дастовардҳои тамаддуни чандинҳазорсолаи тоҷикон аз наздик шинос шуданд. Ҳамчунин ба онҳо оид ба марҳилаҳои асосии ташаккул ва рушди давлатдории тоҷикон, таърихи фарҳанг, санъат ва ҳунарҳои мардумӣ маълумоти муфассал пешниҳод гардид.

Дар анҷоми боздид Марям бинт Абдулла Ал-Аттия аз сатҳи баланди ташкилу баргузории фаъолияти намоишӣ, муҳтавои ғании экспозитсияҳо, тарҳу ороиши толорҳои намоишӣ ва ҳифзу муаррифии мероси таърихию фарҳангии халқи тоҷик дар Осорхонаи миллии Тоҷикистон изҳори қаноатмандӣ намуда, таассуроташро дар китоби «Меҳмонони фахрӣ» навишт.

АКС: Осорхонаи миллии Тоҷикистон