Сафири Тоҷикистон ба Вазири корҳои хориҷии Давлати Кувайт нусхаи эътимоднома супорид

ДУШАНБЕ, 02.07.2026 /АМИТ «Ховар»/. 1 июл Сафири Фавқулода ва Мухтори Ҷумҳурии Тоҷикистон дар Давлати Кувайт Хусрав Нозирӣ ба Вазири корҳои хориҷии Давлати Кувайт Шайх Ҷарроҳ Ҷобир ал-Аҳмад ас-Сабоҳ нусхаи эътимоднома супорид. Дар ин хусус ба АМИТ «Ховар» аз Сафорати Ҷумҳурии Тоҷикистон дар Давлати Кувайт хабар доданд.

Зимни мулоқот ҷонибҳо вазъи кунунӣ ва дурнамои рушди муносибатҳои Тоҷикистону Кувайт, инчунин роҳҳои таҳкими ҳамкориро дар самтҳои гуногун баррасӣ намуданд. Аҳамияти татбиқи тавофуқҳое, ки зимни сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Давлати Кувайт моҳи ноябри соли 2024 ба даст омада буданд, таъкид карда шуд.

Ҳамзамон омодагии ҷонибҳо барои тавсеаи ҳамкорӣ дар бахшҳои иқтисод, тиҷорат, сармоягузорӣ, маориф, фарҳанг ва сайёҳӣ иброз гардида, зарурати таҳкими минбаъдаи муносибатҳои дӯстона байни ду давлат изҳор карда шуд.

Хусрав Нозирӣ дуруду паёми роҳбарияти Ҷумҳурии Тоҷикистонро ба роҳбарияти Давлати Кувайт расонида, омодагии худро барои саҳмгузорӣ дар рушди минбаъдаи муносибатҳои дӯстӣ ва ҳамкории ду мамлакат баён намуд.

Вазири корҳои хориҷии Давлати Кувайт омодагии кишварашро барои густариши ҳамкории дуҷониба бо Ҷумҳурии Тоҷикистон иброз кард.

Ёдовар мешавем, ки муносибатҳои дипломатӣ байни Ҷумҳурии Тоҷикистон ва Давлати Кувайт 31 марти соли 1995 барқарор гардида, давоми ин давра бар пояи эҳтироми мутақобил, эътимод ва манфиатҳои муштарак мунтазам рушд ёфтаанд.

АКС: Сафорати Ҷумҳурии Тоҷикистон дар Давлати Кувайт