Шаҳрвандон ва соҳибкорон тавассути ПОС – терминалҳо ва ҳамёнҳои электронӣ 3,7 миллион амалиёти ғайринақдӣ анҷом доданд
ДУШАНБЕ, 24.07.2026 /АМИТ «Ховар»/. Дар нимсолаи якуми соли равон аз ҷониби шахсони воқеӣ ва соҳибкорони инфиродӣ тавассути ПОС – терминалҳо ва ҳамёнҳои электронии ташкилоти қарзии молиявӣ 3 миллиону 700 ҳазор амалиёти ғайринақдӣ ба маблағи зиёда аз 1 миллиарду 600 миллион сомонӣ гузаронида шуд. Дар ин хусус 22 июл зимни нишасти матбуотӣ Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода иброз намуд.
Нусратулло Давлатзода гуфт, ки мақомоти андоз бо мақсади таъмини рақамикунонии соҳа ва дар ин замина содаю шаффоф гардонидани низоми андозбандӣ ва ҷараёни андозсупорӣ аз имконияти техникии дохилиидоравӣ бештар истифода намуда, барои давра ба давра васеъ намудани хизматрасониҳои давлатӣ дар шакли электронӣ, амалӣ намудани Консепсияи ташаккули ҳукумати электронӣ ва гузариш ба иқтисоди рақамӣ пайваста чораҷӯӣ менамоянд. Давоми солҳои охир номгӯи модулҳои барномавии системаи иттилоотии андоз ва хизматрасониҳои электронии мақомоти андоз васеъ карда шуда, тавассути ин модулҳо барои андозсупорандагон ва шаҳрвандон то инҷониб зиёда аз 50 хизматрасонии электронӣ ба роҳ монда шуд.
Гуфта шуд, ки дар давраи ҳисоботӣ шумораи андозсупорандагоне, ки эъломияҳояшонро ба тариқи электронӣ пешниҳод менамоянд, 14 ҳазор адад зиёд шуда, дар айни замон ҳамаи субъектҳои хоҷагидорӣ эъломия ва ҳисоботи худро ба тариқи электронӣ ба мақомоти андоз пешниҳод намуда истодаанд.
Инчунин иброз гардид, ки дар шашмоҳаи якум дар шаҳру ноҳияҳои ҷумҳурӣ оид ба масъалаҳои риояи қонунгузории андоз, тартиби пешниҳоди ҳисобот ва эъломияҳо дар шакли электронӣ, истифодаи модулҳои барномаи компютерӣ, хизматрасониҳои давлатии мақомоти андоз, аз ҷумла замимаи мобилии «Андози ман», амалисозии лоиҳаи озмоишӣ дар самти андозбандии соҳибкорони инфиродӣ, пешгирии қонунвайронкуниҳо ва дигар масъалаҳои ба андозбандӣ алоқаманд зиёда аз 1 ҳазору 400 машварат гузаронида шудааст.
Раъно НУСРАТУЛЛО,
АМИТ «Ховар»
АКС: АМИТ «Ховар»
Имрӯз дар Тоҷикистон борони кӯтоҳмуддат меборад
ОМОДАГӢ БА ЗИМИСТОН. Иншооти соҳаҳои маориф ва тандурустии шаҳри Роғун бо ангишт, ҳезум ва сӯзишворӣ таъмин мебошанд
Дар Данғара даври ноҳиявии Озмуни ҷумҳуриявии «Беҳтарин хизматчии давлатӣ аз ҳисоби занон» доир гардид
Дар шаҳри Гулистон иншооти нави иҷтимоӣ ба истифода дода шуд
Имрӯз мардуми Мамлакати Шоҳигарии Арабистони Саудӣ 96-солагии ҷашни миллияшонро таҷлил менамоянд
Аз 23 то 25 сентябр дар баъзе минтақаҳои Тоҷикистон омадани сел пешгӯӣ мешавад
Тоҷикистон пас аз рӯзи сеюми Бозиҳои Осиёӣ-2026 дар ҷадвали медалҳо дар зинаи ҳафтум қарор дорад
Дар Тоҷикистон беш аз 800 ҳазор тонна зироати ғалладонагӣ ҷамъоварӣ шудааст
Ҷаласаи Комиссияи Озмуни ҷумҳуриявии «Донандаи беҳтарини асарҳои Пешвои миллат» доир шуд
