Соҳибкори ватандӯст дар ноҳияи Варзоб тақрибан ду километр роҳи деҳаашро мумфарш кард

ВАРЗОБ, 02.07.2026 /АМИТ «Ховар»/. Бахшида ба ҷашни 35-солагии Истиқлоли давлатӣ наздики ду километр роҳи деҳаи Чорбоғи Ҷамоати деҳоти Чорбоғи ноҳияи Варзоб мумфарш карда шуд. Дар ин хусус мухбири минтақавии АМИТ «Ховар» бо истинод ба Мақомоти иҷроияи ҳокимияти давлатии ноҳияи Варзоб хабар медиҳад.

Роҳ бо дастгирии Мақомоти иҷроияи ҳокимияти давлатии ноҳияи Варзоб ва саҳми соҳибкори ватандӯст Неъматулло Сангонов, ки сокини деҳаи Чорбоғ мебошад, мумфарш гардид.

Деҳаи Чорбоғ калонтарин деҳа дар ноҳияи Варзоб ба ҳисоб рафта, мумфаршкунии роҳи он, ки ба таъмири пурра ниёз дошт, ҳамарӯза рафтуомади ҳазорон нафарро ба шаҳри Душанбе осон менамояд.

Дар ноҳияи Варзоб барои мумфаршкунии роҳҳо тадбирҳои зарурӣ андешида шуда, то имрӯз наздики 11 километр роҳҳои маҳаллӣ мумфарш гардидааст. То ҷашни 35-солагии Истиқлолияти давлатӣ дар доираи корҳои созандагию ободонӣ дигар роҳҳои байнидеҳавии ноҳия низ навсозӣ карда мешаванд.

Субҳониддини МАҲМУД,
АМИТ «Ховар»

АКС: Мақомоти иҷроияи ҳокимияти давлатии ноҳияи Варзоб