Соли равон 85 хатмкунандаи Академияи идоракунии давлатӣ соҳиби дипломи аъло шуданд

ДУШАНБЕ, 08.07.2026 /АМИТ «Ховар»/. Соли равон Академияро 1395 нафар хатм намуданд, ки аз ин теъдод 85 нафарашон соҳиби дипломи аъло гардиданд. Дар ин хусус 6 июл зимни нишасти матбуотии Академияи идоракунии давлатии назди Президенти Ҷумҳурии Тоҷикистон иттилоъ дода шуд.

Дар нишасти матбуотӣ ҳамчунин изҳор гардид, ки шумораи умумии гурӯҳҳои таълимии Академия 243 ададро ташкил дода, нисбат ба соли таҳсили 2024–2025 (220 гурӯҳ) 23 гурӯҳ ё 10,45% зиёд гардидааст. Афзоиши шумораи гурӯҳҳои таълимӣ аз рушди фаъолияти таълимӣ, зиёд гардидани шумораи довталабон ва густариши имкониятҳои таҳсил дар Академия шаҳодат медиҳад.

«Аз рӯйи нақшаи таълимӣ, шумораи гурӯҳҳои тоҷикӣ аз 192 ба 216 гурӯҳ расида, 24 гурӯҳ ё 12,5% зиёд гардидааст. Ҳиссаи онҳо дар сохтори умумии гурӯҳҳо 88,9%-ро ташкил медиҳад. Дар ҳамин ҳол, шумораи гурӯҳи русӣ 12 адад ва гурӯҳи англисӣ 15 ададро ташкил медиҳанд»,- гуфта шуд дар нишаст.

АКС: АМИТ «Ховар»