Ваколатдор оид ба ҳуқуқи инсон бо Раиси Кумитаи миллӣ оид ба ҳуқуқи инсони Давлати Қатар вохӯрӣ намуд

ДУШАНБЕ, 06.07.2026 /АМИТ «Ховар»/. 3 июл Ваколатдор оид ба ҳуқуқи инсон Умед Бобозода бо Раиси Кумитаи миллӣ оид ба ҳуқуқи инсони Давлати Қатар доктор Марям бинти Абдуллоҳ Ал-Атийя вохӯрӣ намуд. Дар ин хусус ба АМИТ «Ховар» аз Ваколатдор оид ба ҳуқуқи инсон хабар доданд.

Дар вохӯрӣ ҷонибҳо натиҷаҳои ҳамкории дуҷонибаро мавриди баррасӣ қарор дода, доир ба амалисозии Ёддошти тафоҳуми ҳамкорӣ, таҳкими иқтидори институтсионалӣ, рушди механизмҳои миллии ҳифзи ҳуқуқи инсон, табодули таҷриба дар самти баррасии муроҷиатҳои шаҳрвандон, фаъолияти маърифатӣ, таҳқиқотӣ ва мониторингӣ, инчунин баргузории чорабиниҳои муштарак, омӯзишҳо ва сафарҳои таҷрибаомӯзиро мавриди баррасӣ қарор доданд.

Инчунин мусоҳибон ба масъалаҳои густариши ҳамкорӣ дар доираи созмонҳои байналмилалӣ, аз ҷумла шабакаҳои минтақавӣ ва ҷаҳонии ниҳодҳои миллии ҳуқуқи инсон, таваҷҷуҳи хосса зоҳир намуданд. Ҷонибҳо омодагии худро барои идомаи ҳамкории судманд ва татбиқи босамари нақшаҳои муштарак иброз доштанд.

Дар фарҷоми вохӯрӣ гуфта шуд, ки ҳамкории Тоҷикистону Давлати Қатар дар соҳаи ҳуқуқи инсон дар асоси ҳамкории густурда, эътимод ва шарикии созанда минбаъд низ густариш ёфта, ба таҳкими ҳифзи ҳуқуқу озодиҳои инсон ва рушди ҳамкории байналмилалӣ мусоидат хоҳанд намуд.

АКС: Ваколатдор оид ба ҳуқуқи инсон дар Ҷумҳурии Тоҷикистон