35-СОЛАГИИ ИСТИҚЛОЛИ ДАВЛАТӢ. Дар шаҳри Душанбе беш аз 6500 иншоот бунёду навсозӣ гардидааст

ДУШАНБЕ, 05.08.2026 /АМИТ «Ховар»/. Бо мақсади сазовор таҷлил намудани ҷашни 35-солагии Истиқлоли давлатии Ҷумҳурии Тоҷикистон ва амалӣ намудани корҳои ободонию созандагӣ ба ҳолати 1 июли соли 2026 6559 иншоот сохтаю навсозӣ гардидааст. Дар ин хусус зимни нишасти матбуотӣ муовини якуми Раиси шаҳри Душанбе Бахтиёр Шарифӣ ба хабарнигорон иттилоъ дод.

Ба андешаи Бахтиёр Шарифӣ, дар доираи нақшаи чорабиниҳо барои солҳои 2022-2026 дар шаҳри Душанбе бунёди 57 муассисаи таҳсилоти умумӣ ва томактабӣ бо муҷаҳҳазгардонии 513 таҷҳизоти замонавӣ, 27 муассисаи тандурустӣ, 98 коргоҳу корхонаи саноатӣ, 65 километр роҳ, 51 бинои маъмурӣ, 356 иншооти баландошёна бо 243 маркази хизматрасонӣ, 10 иншооти варзишӣ, 6 меҳмонхона, рангубори 983 бино, таъмиру навсозии 303 нуқтаи партовпартоӣ ва иншооти дигар бо таъсиси 11 ҳазор ҷойи нави кор амалӣ карда шуд, ки дар натиҷа иҷрои нақша ба 1,5 маротиба баробар гардид.

Бояд иброз намуд, ки бо шарофати сиёсати бунёдкоронаи Пешвои миллат муҳтарам Эмомалӣ Раҳмон ва иқдоми созандаи Раиси шаҳри Душанбе муҳтарам Рустами Эмомалӣ пойтахти Тоҷикистон рӯз ба рӯз ободу зебо ва макони писандидаи сайёҳону ҷаҳонгардон мегардад.

Аз ҷумлаи ифтихороти мо дар замони соҳибистиқлолии Ватани муқаддасамон муҷассама ва маҷмааи ёдгории асосгузори давлати мутамаркази тоҷикон — Исмоили Сомонӣ, муҷассамаи поягузори адабиёти классикии тоҷику форс Абӯабдуллоҳ Рӯдакӣ дар маркази Боғи «Устод Рӯдакӣ», муҷассамаи боҳашамати Абулқосим Фирдавсӣ дар Боғи «Фирдавсӣ», муҷассамаи Абдураҳмони Ҷомӣ ва Алишер Навоӣ дар Боғи фарҳангу фароғатии ба номи Алишер Навоӣ, пайкараи Қаҳрамони Тоҷикистон Садриддин Айнӣ дар Боғи ба номи Садриддин Айнӣ ҳамчун тантанаи адолати таърихӣ ва рамзи таҳкими ваҳдати милливу эҳёи Тоҷикистон маҳз дар мавзеъҳои зебоманзари шаҳри Душанбе қомат афрохтаанд.

Ҳамчунин қомат афрохтани Қасри миллат, Нишони давлатӣ, парафшон шудани Парчами миллӣ, бунёду навсозии боғҳои ба номи Куруши Кабир, Абӯабдуллоҳи Рӯдакӣ, Абулқосим Фирдавсӣ, Алишер Навоӣ, Умари Хайём, Аҳмади Дониш, Садриддин Айнӣ, кӯли «Ҷавонон», маҷмааи Наврӯзгоҳ аз ҷумлаи ободкориҳое мебошанд, ки бозгӯи санъати баланди шаҳрсозии мардуми мо ба ҳисоб мераванд.

Ин ҳама пешравиҳои рӯзафзун ва рушду тараққиёт маҳз ба туфайли Истиқлоли давлатӣ, Ваҳдати миллӣ, сулҳи саросарӣ, амнияту субот ҳамчун пойдевор ва маншаи ҳама пешрафту комёбиҳои назаррас дар соҳаҳои мухталифи шаҳрдорӣ рӯйи кор омада, умеди мардумро ба ояндаи дурахшони давлати соҳибистиқлоламон беш аз пеш афзун менамоянд.

Зарангези ЛАТИФ,
АМИТ «Ховар»

АКС: АМИТ «Ховар»