35-СОЛАГИИ ИСТИҚЛОЛИ ДАВЛАТӢ. Дар шаҳри Ҳисор қариб се километр роҳ мумфарш карда шуд

ДУШАНБЕ, 11.08.2026 /АМИТ «Ховар»/. Дар доираи корҳои ободонӣ бахшида ба 35-солагии Истиқлоли давлатии Ҷумҳурии Тоҷикистон дар Ҷамоати деҳоти Алмосии шаҳри Ҳисор қариб се километр роҳи маҳаллӣ мумфарш гардид. Бо ин амал ҳолати роҳи байни деҳаҳои Алмосӣ, Сангчашма, Бобосурхон ва Наврӯзӣ ба таври назаррас беҳтар карда шуд.

АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад, ки амалӣ шудани ин иқдом барои сокинон ҳаракати осону бехатарро фароҳам оварда, дастрасиро ба маркази ҷамоат ва муассисаҳои иҷтимоию хизматрасонӣ осон намуд.

Корҳои созандагӣ бо дастгирии соҳибкорон ва саҳми сокинони маҳал иҷро гардиданд. Ин иқдом намунаи равшани ҳамбастагӣ, масъулияти шаҳрвандӣ ва саҳмгузории аҳолӣ дар ободии маҳалли зист мебошад.

Зимни шиносоии роҳбарияти шаҳри Ҳисор  бо корҳои анҷомдода гуфта шуд, ки ободии маҳал ва беҳтар намудани сатҳи зиндагии сокинони деҳот аз самтҳои муҳими фаъолияти мақомоти маҳаллии ҳокимияти давлатӣ буда, идомаи чунин ташаббусҳо метавонад барои рушди инфрасохтор дар ҷамоат заминаи мусоид фароҳам оварад.

Сокинони Ҷамоати деҳоти Алмосӣ изҳор доштанд, ки мумфарш гардидани роҳи байни деҳаҳо барои онҳо аҳамияти калон дошта, натиҷаи дастгирӣ ва ҳамкории мақомоти маҳаллӣ, соҳибкорон ва аҳолӣ мебошад.

Баргузории корҳои созандагиву ободонӣ дар Ҷамоати деҳоти Алмосӣ бозгӯи он аст, ки бо муттаҳидии мардум, дастгирии соҳибкорон ва таваҷҷуҳи пайваста ба рушди инфрасохтор метавон симои маҳалро боз ҳам ободу зебо ва шароити зиндагии сокинонро беҳтар намуд.

АКС: Мақомоти иҷроияи ҳокимияти давлатии шаҳри Ҳисор