Ҷалби ширкатҳои чинӣ барои татбиқи лоиҳаҳои энергетикии Тоҷикистон баррасӣ гардид

ДУШАНБЕ, 15.08.2026 /АМИТ «Ховар»/. Тоҷикистон ҳамкориро дар соҳаи энергетика ва захираҳои об бо ширкатҳои пешрафтаи соҳавии Ҷумҳурии Мардумии Чин тақвият медиҳад, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳруии Тоҷикистон.

Дар ин замина дар шаҳри Душанбе мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо президенти ширкати «YEMA GROUP CO., LTD» Чэн Сян ва намояндагони ширкатҳои «Sichuan Hebang Investment Group Co., Ltd», «China Feilhe Limited», «Zhejiang ZHINK Group Co., Ltd» ва «Beijing Century Beking Furniture Co., Ltd»-и Ҷумҳурии Мардумии Чин доир гардид.

Вазир ба роҳбарон ва намояндагони ширкатҳои чинӣ оид ба имконоти васеи сармоягузорӣ дар кишвар, иқтидори энергетикии Тоҷикистон, захираҳои обӣ ва афзалияти соҳаҳои мазкур маълумот пешниҳод намуд.

Таъкид гардид, ки барои рушди устувори соҳаҳо ва татбиқи лоиҳаҳои муҳими инфрасохторӣ ҷалби сармоя ва технологияҳои муосир аҳамияти муҳим дорад.

Дар мулоқот омодагии ҷонибҳо барои таҳкими робитаҳои ҳамкорӣ ва идомаи муколама дар самти ҷалби сармоягузорӣ ба соҳаҳои афзалиятноки энергетика ва захираҳои об баён гардид.

АКС: Вазорати энергетика ва захираҳои оби Ҷумҳурии Тоҷикистон