Ҳамкории мақомоти судии Тоҷикистон ва Кувайт густариш меёбад

ДУШАНБЕ, 25.08.2026 /АМИТ «Ховар»/. Масъалаҳои бозомӯзии судяҳо, истифодаи таҷрибаи пешқадам барои таҳкими мустақилияти судҳо, баланд бардоштани самаранокӣ ва сифати адолати судӣ, инчунин ба роҳ мондани ҳамкории муштарак дар самти баргузории чорабиниҳои илмӣ-амалӣ 24 август зимни вохӯрии Раиси Суди Олии Ҷумҳурии Тоҷикистон Рустам Мирзозода бо Сафири Фавқулода ва Мухтори Давлати Кувайт дар Ҷумҳурии Тоҷикистон Муҳаммад Рошид Ал-Амирӣ мавриди баррасӣ қарор гирифтанд.

Тавре ба АМИТ «Ховар» аз Суди Олии Тоҷикистон хабар доданд, дар вохӯрии ҷонибҳо инчунин доираи васеи масъалаҳои марбут ба рушди ҳамкории мақомоти судии ду давлат ва табодули таҷрибаи касбӣ баррасӣ гардид.

Гуфта шуд, ки таҳкими робитаҳои байналмилалӣ дар самти татбиқи адолати судӣ, густариши табодули таҷрибаи касбӣ ва амалӣ намудани унсурҳои муосири рақамӣ дар фаъолияти судҳо аҳамияти муҳим дорад. Ифтитоҳи Сафорати Давлати Кувайт дар шаҳри Душанбе бозгӯйи таваҷҷуҳи хос ва эътимоди баланди роҳбарияти ду давлат ба рушди минбаъдаи муносибатҳои дуҷониба мебошад.

Ҷонибҳо ба идомаи муколамаи созанда ва тавсеаи ҳамкории дуҷониба изҳори итминон карданд.

АКС: Суди Олии Ҷумҳурии Тоҷикистон