Ҳамкории Тоҷикистон ва Эрон дар соҳаи илму фарҳанг баррасӣ шуд

ДУШАНБЕ, 05.08.2026 /АМИТ «Ховар»/. Сафири Фавқулода ва Мухтори  Ҷумҳурии Тоҷикистон  дар Ҷумҳурии Исломии Эрон Низомиддин Зоҳидӣ бо раиси Анҷумани осор ва мафохири фарҳангии Эрон Маҳмуди Шолуӣ мулоқот намуд.

Тавре ба АМИТ «Ховар» аз Сафорати Ҷумҳурии Тоҷикистон  дар Ҷумҳурии Исломии Эрон хабар доданд, дар мулоқот ҷонибҳо дар бораи густариши ҳамкорӣ дар соҳаи илму фарҳанг табодули назар карданд.

Таъкид гардид, ки Анҷумани осор ва мафохири фарҳангӣ дар баробари бузургдошти чеҳраҳои мондагори илму фарҳанги Эрон аз хидматҳои барҷастаи илмию фарҳангии бузургони кишварҳои форсизабон низ тақдиру таҷлил мекунад.

Аз ҷумла, солҳои гузашта Анҷуман маҳфилҳои бошукуҳи бузургдошти устодон Садриддин Айнӣ, Бобоҷон Ғафуров, Муҳаммадҷон Шакурӣ ва Лоиқ Шералиро баргузор намуда, маҷмуаи мақолаҳоро оид ба  рӯзгору осори ин бузургони Тоҷикистон нашр намуд.

Дар ин замина ҷонибҳо имконияти баргузор намудани чорабиниҳои муштараки илмию фарҳангӣ доир ба бузургдошти нухбагони дигари Тоҷикистонро мавриди баррасӣ қарор доданд.

 АКС: Сафорати Ҷумҳурии Тоҷикистон дар Ҷумҳурии Исломии Эрон