Ҳавопаймои хатсайри Душанбе–Минск бо маросими анъанавӣ истиқбол гирифта шуд

ДУШАНБЕ, 31.08.2026 /АМИТ «Ховар»/. 29 август дар Фурудгоҳи миллии «Минск» маросими истиқболи ҳавопаймои хатсайри мунтазами ҳавоии ширкати ҳавопаймоии «Сомон Эйр» аз Душанбе баргузор гардид. Ҳавопаймо зери фаввораи анъанавии обӣ ба фурудгоҳ ворид шуда, ба ин васила ба хатсайри нави мустақими ҳавоии Душанбе–Минск оғоз бахшид, хабар медиҳад АМИТ «Ховар».

Мусофирон ва ҳайати сарнишинонро дар назди ҳавопаймо бо нони миллии Беларус — «каравай», ки рамзи меҳмоннавозӣ ва самимияти мардуми Беларус мебошад, истиқбол гирифтанд.

Ифтитоҳи хатсайри мустақими ҳавоӣ байни Душанбе ва Минск на танҳо таъсиси долони нави нақлиётӣ, балки қадами муҳим дар таҳкими муносибатҳои дӯстӣ ва ҳамкории Тоҷикистон ва Беларус арзёбӣ мешавад.

Ба иттилои ширкати ҳавопаймоии «Сомон Эйр», хатсайри нав ба муносибати 35-солагии Истиқлоли давлатии Ҷумҳурии Тоҷикистон ба роҳ монда шуда, барои таҳкими робитаҳои дӯстӣ, густариши муносибатҳои фарҳангӣ, рушди сайёҳӣ ва тавсеаи ҳамкории тиҷоративу иқтисодии ду кишвар аҳамияти муҳим дорад.

Роҳбарияти Фурудгоҳи миллии «Минск» изҳор дошт, ки парвози мустақим барои мусофирон имкони зуд ва бароҳати расидан ба макони таъйинотро фароҳам оварда, зарурати анҷоми сафарҳои тӯлонӣ бо чандин таваққуфро аз байн мебарад.

Таъкид гардид, ки парвозҳо дар ин хатсайр минбаъд метавонанд афзоиш ёфта, Фурудгоҳи миллии «Минск» барои хизматрасонии мусофирони афзоянда бо сатҳи мутобиқ ба стандартҳои байналмилалӣ омода мебошад.

Парвозҳо дар хатсайри Душанбе–Минск–Душанбе ҳафтае як маротиба — рӯзҳои шанбе анҷом дода мешаванд. Нахустин парвоз 29 август анҷом дода шуд.

АКС: MSQ.Spotter