Дар Душанбе бахшида ба 35-солагии Истиқлолияти давлатӣ ҳамоиши тантанавӣ баргузор гардид

ДУШАНБЕ, 26.08.2026 /АМИТ «Ховар»/. Имрӯз бахшида ба 35-солагии Истиқлолияти давлатӣ дар Театри давлатии академии опера ва балети ба номи Садриддин Айнӣ ҳамоиши тантанавӣ баргузор гардид.

Тавре аз Вазорати фарҳанги Ҷумҳурии Тоҷикистон ба АМИТ «Ховар» иттилоъ доданд, пеш аз оғози ҳамоиш намоиши китобҳо ва дастовардҳои соҳаи фарҳанг пешниҳод гардид. Ҳамчунин дар доираи ҳамоиш китоби «Фарҳанг–ҷавҳари ҳастии миллат» муаррифӣ карда шуд.

Иттилоъ дода шуд, ки ин китоб дар Нашриёти «Адиб» чоп гардида, аз маҷмуаи мақолаҳо оид ба дастовардҳои бахшҳои фарҳанг дар даврони 35 соли Истиқлолияти давлатӣ иборат мебошад.

Вазири фарҳанги Ҷумҳурии Тоҷикистон Матлубахон Сатториён иброз намуд, ки «фарҳанг яке аз рукнҳои асосии ҳастии миллат ба ҳисоб рафта, дар таҳкими худшиносии миллӣ, ҳифзи арзишҳои таърихию фарҳангӣ ва муаррифии дастовардҳои фарҳанги тоҷик нақши муҳим дорад».

Дар ҳамоиш як зумра намояндагони илму адаб ва фарҳанг бо нишони «Аълочии фарҳанги Ҷумҳурии Тоҷикистон» сарфароз гардонида шуданд. Дар анҷоми ҳамоиш аз ҷониби ҳунармандони шинохтаи мамлакат барномаи фарҳангӣ пешниҳод гардид.

АКС: Вазорати фарҳанги Ҷумҳурии Тоҷикистон