Дар Душанбе беш аз 7 ҳазор қуттӣ сигори бе тамғаи аксизӣ ошкор гардид

ДУШАНБЕ, 17.08.2026 /АМИТ «Ховар»/. Зимни гузаронидани чорабиниҳои оперативӣ-ҷустуҷӯӣ аз ҷониби кормандони мақомоти  гумруки Тоҷикистон дар шаҳри Душанбе воситаи нақлиёти тамғаи «KIA SEDONA» боздошт гардид, ки ҳангоми азназаргузаронӣ аз дохили бордони мошин 716 баста, дар маҷмуъ 7160 қуттӣ сигори тамғаи «ESSE CHANGE», истеҳсоли Ҷумҳурии Корея, бе тамғаи аксизии воридотӣ ошкор карда шуд. Дар ин хусус АМИТ «Ховар» бо истинод ба Хадамоти гумруки назди Ҳукумати Ҷумҳурии Тоҷикистон иттилоъ медиҳад.

Тибқи хабари манбаъ, мошин ба шаҳрванд Н.А.П,  сокини 34-солаи шаҳри Ҳисор тааллуқ доштааст.

Муайян гардид, ки маҳсулоти мазкур бе назорати гумрукӣ ба ҳудуди гумрукии Ҷумҳурии Тоҷикистон ворид гардида, дар муомилот қарор доштааст.

Бо назардошти далелҳои ҷамъоваришуда Прокуратураи генералии Ҷумҳурии Тоҷикистон нисбат ба шаҳрванд Н.А.П бо аломатҳои ҷинояти пешбининамудаи қисми 1 моддаи 259 Кодекси ҷиноятии Ҷумҳурии Тоҷикистон парвандаи ҷиноятӣ оғоз намуда, тафтиши пешакӣ идома дорад.

АКС: Хадамоти гумруки назди Ҳукумати Ҷумҳурии Тоҷикистон