Дар Душанбе Рӯзи фарҳанги ноҳияи Варзоб баргузор шуд

ДУШАНБЕ, 09.08.2026 /АМИТ «Ховар»/. Имрӯз дар Боғи кӯдакони шаҳри Душанбе Рӯзи фарҳанги ноҳияи Варзоб баргузор гардид, иттилоъ медиҳад АМИТ «Ховар».

Меҳмонон ва сокинони пойтахт бо дастовардҳои иҷтимоиву иқтисодӣ ва фарҳангии ноҳияи Варзоб аз наздик шинос шуданд. Намоиши маҳсулоти кишоварзӣ, ҳунарҳои мардумӣ, таомҳои миллӣ ва барномаҳои рангини фарҳангиву фароғатӣ таваҷҷуҳи иштирокчиёнро ҷалб намуд.

Дар намоиш-фурӯш ҳама ҷамоатҳои шаҳраку деҳоти ноҳия бо маҳсулоти гуногун хаймаҳои зиёд ороста, анвои гуногуни маҳсулот ва ҳунармандон маҳсули дасти худро ба сокинону меҳмонони пойтахт пешниҳод карданд.

Дар намоиш маҳсулоти мавриди ниёзи аввал, аз қабили гӯшт, помидор, картошка, пиёз, бодиринг, зардолу, тухм, тарбуз, харбуза, асал, себ, шафтолу, олуболу ва ғайра бо нархи нисбат ба бозор арзонтар ба фурӯш гузошта шуд, ки сокинони пойтахт аз он хариданд.

Ёдовар мешавем, ки Рӯзҳои фарҳанги шаҳру ноҳияҳо тибқи «Ҷадвали баргузории ҷашну солгард, фестивалу намоиш, иду озмунҳои фарҳангию маърифатӣ ва анъанаю ҳунарҳои мардумӣ дар Ҷумҳурии Тоҷикистон барои соли 2026» баргузор мешаванд.

Дар ин рӯзҳо кормандони шуъбаҳои фарҳанги вилоятҳо ва шаҳру ноҳияҳои ҷумҳурӣ бо пешниҳоди барномаи ҷолиби консертӣ, намоиши молу маҳсулот ва ҳунарҳои мардумӣ хотири сокинон ва меҳмонони пойтахтро шод мегардонанд.

АКС: АМИТ «Ховар»