Дар Филиали Донишгоҳи давлатии Москва дар шаҳри Душанбе ду маркази нави илмӣ ба фаъолият оғоз менамояд

ДУШАНБЕ, 14.08.2026 /АМИТ «Ховар»/. Дар доираи таҷлили 35-солагии Истиқлолияти давлатии Ҷумҳурии Тоҷикистон дар Филиали Донишгоҳи давлатии Москва ба номи М.В. Ломоносов дар шаҳри Душанбе ду маркази нави илмӣ ба фаъолият оғоз менамояд. Дар ин хусус 13 август директори иҷроияи Филиали Донишгоҳи давлатии Москва ба номи М.В. Ломоносов дар шаҳри Душанбе Баҳрулло Файзализода зимни нишасти матбуотӣ иттилоъ дод.

Ба иттилои директори филиал, бахшида ба 35-солагии Истиқлолияти давлатӣ Маркази илмӣ-таҳқиқотии «Ташаббусҳои давлатӣ, сиёсати хориҷӣ ва дипломатияи Эмомалӣ Раҳмон» ва «Маркази рушди зеҳни сунъӣ, таҳлили додаҳо ва технологияҳои рақамӣ» (дар доираи лоиҳаи Ҷамъияти саҳомии пӯшидаи «Бонки байналмилалии Тоҷикистон») ба фаъолият оғоз менамоянд. Ин марказҳо ба рушди таҳқиқоти илмӣ, татбиқи технологияҳои рақамӣ ва омодасозии мутахассисони ҷавобгӯ ба талаботи замон мусоидат хоҳанд кард.

Ҳамзамон иброз гардид, ки фаъолияти филиал ба татбиқи вазифаҳои афзалиятнок, аз ҷумла баланд бардоштани сифати таҳсил, рушди барномаҳои таълимӣ, густариши ҳамкории байналмилалӣ, тақвияти фаъолияти нашриявии олимону омӯзгорон, рақамикунонии раванди таълим, такмили инфрасохтори илмӣ, таҳкими ҳамкорӣ бо корфармоён, дастгирии муҳаққиқони ҷавон ва донишҷӯёни болаёқат равона мегардад.

Ин тадбирҳо барои боз ҳам баланд бардоштани нуфузи филиал ҳамчун яке аз муассисаҳои пешрафтаи таҳсилоти олии Ҷумҳурии Тоҷикистон заминаи устувор фароҳам меоранд.

Зарангези ЛАТИФ,
АМИТ «Ховар»

АКС: АМИТ «Ховар»