Дар Хадамоти иҷро оид ба татбиқи хизматрасониҳои электронӣ машварати омӯзишӣ доир гардид

ДУШАНБЕ, 04.08.2026 /АМИТ «Ховар»/. Дар Хадамоти иҷрои назди Ҳукумати Ҷумҳурии Тоҷикистон бо иштироки намояндагони Агентии инноватсия ва технологияҳои рақамии назди Президенти Ҷумҳурии Тоҷикистон, Бонки миллии Тоҷикистон, Хадамоти алоқаи назди Ҳукумати Ҷумҳурии Тоҷикистон ва дигар ниҳодҳои дахлдор оид ба баланд бардоштани сатҳи дониш ва малакаи кормандон дар самти истифодаи технологияҳои муосири рақамӣ машварати омӯзишӣ баргузор шуд.

Тавре АМИТ «Ховар» бо истинод ба Хадамоти иҷро хабар медиҳад, дар машварат масъалаҳои истифодаи дурусти портали хизматрасониҳои давлатӣ, портали ягонаи гардиши ҳуҷҷатҳои электронӣ, талаботи асосии амнияти киберӣ ва молиявӣ, тартиби ҳифзи маълумот, инчунин дигар масъалаҳои муҳим оид ба рақамикунонии фаъолияти мақомоти давлатӣ баррасӣ шуданд.

Таъкид гардид, ки татбиқи босамари технологияҳои рақамӣ, истифодаи дурусти системаҳои электронии давлатӣ ва риояи меъёрҳои амнияти иттилоотӣ аз омилҳои муҳими баланд бардоштани самаранокии фаъолияти мақомоти давлатӣ, шаффофият ва беҳтар гардидани сифати хизматрасониҳо ба шаҳрвандон ба ҳисоб меравад.

Ҳамзамон иштирокчиён оид ба масъалаҳои амалии истифодаи системаҳои электронӣ мубодилаи афкор намуданд.

АКС: Хадамоти иҷрои назди Ҳукумати Ҷумҳурии Тоҷикистон