Дар Хуҷанд даври шаҳрии Озмуни ҷумҳуриявии «Беҳтарин хизматчии давлатӣ аз ҳисоби занон» доир шуд

ДУШАНБЕ, 12.08.2026 /АМИТ «Ховар»/. Дар шаҳри Хуҷанд бо иштироки занони хизматчии давлатӣ даври шаҳрии Озмуни ҷумҳуриявии «Беҳтарин хизматчии давлатӣ аз ҳисоби занон» доир шуд.

Тавре ба АМИТ «Ховар» аз Мақомоти иҷроияи ҳокимияти давлатии шаҳри Хуҷанд хабар доданд, озмун аз рӯи се шарт баргузор гардид. Дар он 25 довталаб иштирок намуда, аз байни онҳо 3 нафар ба даври вилоятии озмун роҳхат гирифт.

Озмуни «Беҳтарин хизматчии давлатӣ аз ҳисоби занон» бо мақсади иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон оид ба фаъолгардонии нақши занон дар ҷомеа ва таъмини иштироки онҳо дар идоракунии давлатӣ тибқи нақшаи амали «Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023–2030» гузаронида мешавад.

Озмун ҳамасола байни занону духтароне, ки дар соҳаи хизмати давлатии шаҳрвандӣ фаъолият менамоянд, гузаронида мешавад. Он ба ҳавасмандгардонии занони хизматчии давлатӣ барои таъмини фаъолияти самаранок дар хизмати давлатӣ, тақвияти дониш, малака ва касбияти онҳо, баланд бардоштани ҳисси ватандӯстӣ ва ифтихори миллӣ, инчунин таъмини ҳуқуқу манфиатҳои онҳо мусоидат менамояд.

Даврҳои озмуни ҷумҳуриявии «Беҳтарин хизматчии давлатӣ аз ҳисоби занон» дар айни замон дар вазорату идораҳо, вилоятҳо, шаҳру ноҳияҳои тобеи ҷумҳурӣ баргузор гардида истодаанд. Даври ниҳоии озмун бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон ҷамъбаст карда мешавад.

АКС: Мақомоти иҷроияи ҳокимияти давлатии шаҳри Хуҷанд