Дар Кумитаи бехатарии озуқаворӣ оид ба пешгирӣ ва муқовимат ба коррупсия вохӯрӣ баргузор шуд

ДУШАНБЕ, 22.08.2026 /АМИТ «Ховар»/. 20 август дар Кумитаи бехатарии озуқавории назди Ҳукумати Ҷумҳурии Тоҷикистон бо намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон вохӯрӣ баргузор шуд, ки дар он  татбиқи «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» баррасӣ гардид, хабар медиҳад АМИТ «Ховар» бо истинод ба кумита.

Намояндаи Агентии назорати давлатии молиявӣ ва мубориза бо коррупсия Фаромарз Раҳмонзода оид ба мазмун ва моҳияти стратегия ва нақшаи амали он, пешгирӣ ва муқовимат ба коррупсия, риояи қатъии талаботи қонунгузорӣ, баланд бардоштани масъулияти хизматии кормандон ибрози назар намуд.

Гуфта шуд, ки коррупсия яке аз зуҳуроти манфии ҷомеа ба шумор рафта, метавонад ба рушди устувори иқтисоди миллӣ ва баланд бардоштани сатҳи некуаҳволии аҳолӣ таъсири манфӣ расонад. Аз ин рӯ, мубориза бо он бояд ҳаматарафа ва бо истифода аз механизмҳои муассири ҳуқуқӣ ташкил карда шавад.

Кормандони кумита бояд дар фаъолияти хизматӣ талаботи қонунгузории Ҷумҳурии Тоҷикистонро қатъиян риоя намуда, ба ҳама гуна зуҳуроти коррупсионӣ роҳ надиҳанд, дар пешгирии онҳо ва таҳкими волоияти қонун саҳми арзанда гузоранд.

АКС: Кумитаи бехатарии озуқавории назди Ҳукумати Ҷумҳурии Тоҷикистон