Дар нахустин Форуми маъданҳои муҳими Тоҷикистону Корея дар Сеул иқтидори маъдании Тоҷикистон муаррифӣ гардид

ДУШАНБЕ, 12.08.2026 /АМИТ «Ховар»/. Имрӯз дар шаҳри Сеул- пойтахти Корея нахустин Форуми маъданҳои муҳими Тоҷикистону Корея баргузор гардид, иттилоъ медиҳад АМИТ «Ховар» бо истинод ба Вазорати саноат ва технологияҳои нави Ҷумҳурии Тоҷикистон.

Дар Форуми маъданҳои муҳими Тоҷикистону Корея намояндагони масъули Дастгоҳи иҷроияи Президенти Ҷумҳурии Тоҷикистон, Вазорати саноат ва технологияҳои нави Ҷумҳурии Тоҷикистон, Саридораи геологияи назди Ҳукумати Ҷумҳурии Тоҷикистон, Вазорати савдо, саноат ва захираҳои Ҷумҳурии Корея, Корпоратсияи Корея оид ба барқарорсозии конҳо ва истихроҷи маъданҳо (KOMIR), Институти илмҳои геологӣ ва захираҳои минералии Корея (KIGAM), Бонки содиротии Корея Кексимбонк ва бахши хусусии ду давлат иштирок намуданд.

Дар Форуми маъданҳои муҳими Тоҷикистону Корея дурнамои ҳамкорӣ дар соҳаи истихроҷи маъданҳо ва металлҳои қиматбаҳо, таъмини талабот ба маъданҳои муҳим ва устувории занҷираҳои таъминот мавриди баррасӣ қарор гирифтанд.

Дар форум намояндагони масъули Тоҷикистон ва Кореяи Ҷанубӣ сухан намуда, имконоти Тоҷикистонро дар самти захираҳои маъдании муҳим муаррифӣ карданд.

Ҳамчунин имконияти ҳамкории муштарак дар самти рушди захираҳои зеризаминӣ ва ташкили занҷири эҷоди арзиши иловашуда ва таҷрибаи Корея дар соҳаи рушди занҷираҳои таъминот муаррифӣ шуд.

Дар қисми ниҳоии чорабинӣ вохӯриҳои корӣ дар шакли B2B байни намояндагони мақомоти давлатӣ, бахши хусусӣ, аз ҷумла ширкатҳои «Пакруд», «Талко голд», «Апрелевка», «Канзи диёр», «Анзоб», «ШКС Тоҷикистону Чин», «Дастрас 2011» ва «ТБЕА» бо ширкатҳои кореягӣ доир шуданд.

Дар ҷараёни ин мулоқот ҷонибҳо имконияти ҳамкории мустақим, татбиқи лоиҳаҳои муштарак ва ҷалби сармоягузориро баррасӣ карданд.

Баргузории чунин форумҳо қадами муҳим дар самти таҳкими ҳамкории иқтисодию саноатии Тоҷикистон ва Ҷумҳурии Корея мебошад. Он ба муаррифии имконияти сармоягузорӣ ва истифодаи самараноки иқтидори бузурги захираҳои маъдании Тоҷикистон мусоидат менамояд.

АКС: Вазорати саноат ва технологияҳои нави Ҷумҳурии Тоҷикистон