Дар Рӯзи фарҳанги Вилояти Мухтори Кӯҳистони Бадахшон ба сокинони пойтахт ганҷинаи нотакрори ҳунар пешниҳод гардид

ДУШАНБЕ, 23.08.2026 /АМИТ «Ховар»/. Имрӯз дар Боғи «Ирам»-и пойтахт Рӯзи фарҳанги Вилояти Мухтори Кӯҳистони Бадахшон бо шукуҳу шаҳомати хос баргузор гардид. Рӯзи фарҳангӣ фарогири намоиши маҳсулоти кишоварзиву саноатӣ, ҳунарҳои мардумӣ, таомҳои миллӣ ва барномаи рангини фарҳангию адабии аҳли ҳунар буд.

Зимни ифтитоҳи он иброз гардид, ки шаҳри Душанбе на танҳо маркази сиёсиву маъмурии мамлакат, балки меҳвари муҳими таҳкими ваҳдати миллӣ, ҳифзи мероси фарҳангӣ ва густариши робитаҳо байни минтақаҳои мамлакат мебошад. Маҳз дар пойтахт сокинону меҳмонон имконият пайдо мекунанд, ки бо анъанаҳо, фарҳанг ва дастовардҳои гӯшаҳои гуногуни Тоҷикистон аз наздик шинос шаванд.

Баргузории Рӯзҳои фарҳангӣ барои таҳкими фазои ягонаи фарҳангии ҷумҳурӣ, муаррифии эҷодиёти мардумӣ ва эҳёи суннатҳои таърихии халқи тоҷик аҳамияти махсус дорад.

Вилояти Мухтори Кӯҳистони Бадахшон дар шарқи Ҷумҳурии Тоҷикистон ҷойгир аст. Вилояти Мухтори Кӯҳистони Бадахшон, ки онро «Боми ҷаҳон» ҳам меноманд, аз ҷиҳати масоҳат вилояти калонтарини мамлакат ба ҳисоб меравад, аммо аксари масоҳаташро кӯҳҳо ташкил медиҳанд. Масоҳати бештари вилоятро баландкӯҳҳо ташкил медиҳанд. Вилояти Мухтори Кӯҳистони Бадахшон дар муқоиса бо Тибет, Ҳимолой ва ғайра аз маконҳои баландкӯҳи ҷаҳон ба шумор меравад. Аз ҳама қуллаи баландтарини вилоят «Қуллаи Комунизм»- ҳозира Исмоили Сомонӣ ба шумор рафта, баландии он 7495 метрро ташкил медиҳад. Маҳз ба ҳамин хотир ин маконро «Боми ҷаҳон» ном мебаранд. Дар он 1 шаҳр, 7 ноҳия ва 43 ҷамоати деҳот ҷойгир мебошад.

Вилояти Мухтори Кӯҳистони Бадахшон яке аз минтақаҳои ҷолиби сайёҳӣ ба ҳисоб рафта, бо рӯдҳо ва дарёчаҳои шӯх, кӯлҳо, кӯҳҳои сар ба фалак ва манзараҳои беҳамто дар ҷаҳон шуҳрат пайдо кардааст. Ба рушди соҳаи сайёҳии вилоят инчунин мавҷудияти ҷойҳои таърихию табобатӣ, ба монанди кӯли Сарез, осоишгоҳи Гармчашма, Авҷ, Ямчун, Ҷелондеҳ, Бибӣ Фотимаи Зуҳро, қаторкӯҳҳои баландтарин дар ҷаҳон-пиряхҳои Помир ва ғайра мусоидат менамоянд.
Иттилоъ дода шуд, ки ҳамасола теъдоди зиёди сайёҳони хориҷӣ маҳз барои боздид аз мавзеъҳои сайёҳии вилоят ба мамлакат ворид шуда, ба намудҳои сайёҳии кӯҳнавардӣ, экологӣ ва экскурсионӣ машғул мешаванд. Инчунин дар ҳудуди вилоят 4 осоишгоҳ мавҷуд буда, ёдгориҳои таърихию фарҳангӣ 251 ададро ташкил медиҳанд.

Ба хотири он ки бештари масоҳати ин вилоятро кӯҳҳо ташкил медиҳанд, аз ин рӯ шуғли мардум асосан дар ин минтақаи кӯҳистон чорводорӣ, кишту кор ва заминдорӣ аст. Дар заминҳо картошка, гандуму ҷав ва дигар навъи донагиҳоро корида, гову гӯсфанд ва буз мепарваранд. Ҳамчунин дар ин ҷо ҳунарҳои мардумӣ низ хеле тараққӣ кардаанд. Занон ба бофтани ҷӯробҳо, дӯхтани тоқӣ ва мардон ба кулолгарию бофтани сабадҳо машғул ҳастанд.

АКС: АМИТ «Ховар»