Дар Тоҷикистон нақшаи кишти такрорӣ 96 фоиз иҷро гардид

ДУШАНБЕ, 04.08.2026 /АМИТ «Ховар»/. То 1 августи соли 2026 дар 183 ҳазору 772 гектар кишти такрорӣ гузаронида шудааст, ки 96 фоизи нақшаро ташкил медиҳад. Дар 112 ҳазору 552 гектар зироати ғалладонагӣ, дар 7 ҳазору 243 гектар зироати полезӣ, дар 3257 гектар зироати техникӣ, дар 32 ҳазору 780 гектар зироати хӯроки чорво, дар 18 ҳазору 003 гектар сабзавот ва дар 315 гектар картошка кишт гардидааст.

Тавре ба АМИТ «Ховар» аз Вазорати кишоварзии Ҷумҳурии Тоҷикистон иттилоъ доданд, бо мақсади истифодаи самараноку оқилонаи заминҳои корами обӣ ва гирифтани ду ё се ҳосил аз як замин соли 2026 дар 191 000 гектар  замини хоҷагиҳои деҳқонӣ ва ҷамоавии ҷумҳурӣ гузаронидани кишти такрорӣ пешбинӣ гардидааст.

Дар Тоҷикистон кишти такрорӣ асосан аз моҳи июн то моҳи август гузаронида мешавад. Он баъди ҷамъоварии ҳосили зироати барвақтӣ анҷом ёфта, имконият медиҳад, ки аз як қитъаи замин дар як сол ду ё се ҳосил гирифта шавад. Ҳадафи он баланд бардоштани самаранокии истеҳсолоти кишоварзӣ мебошад.

Тавре омӯзгори Институти зироаткории Академияи илмҳои кишоварзии Тоҷикистон Раҷабалӣ Шарифов иброз намуд, рӯёнидани ҳосили баланди зироати кишоварзӣ ва гирифтани ду ё се ҳосил дар кишти такрорӣ аз муҳлати кишт, истифодаи навъҳои тезпаз ва риояи агротехникаи парвариш вобастагӣ дорад.

Тибқи таҳилҳои олимони соҳаи кишоварзӣ, давомнокии рӯзҳои офтобӣ баъд аз ҷамъоварии ҳосили тирамоҳӣ дар вилояти Суғд 100-110 рӯз, вилояти Хатлон 140-150 рӯз ва Ҳисор 120-130 рӯз мебошад. Аз ин рӯ, кишоварзон барои ҳифзи амнияти озуқаворӣ дар мамлакат аз ин рӯзҳои офтобӣ бояд самаранок истифода намоянд. Инчунин тамоми тадбирҳои заруриро барои кам кардани вобастагии бозори истеъмолӣ аз молу маҳсулоти воридотӣ самаранок истифода намоянд.

АКС: АМИТ «Ховар»