Дар Вазорати рушди иқтисод ва савдои Тоҷикистон рақамикунонии бизнес-равандҳо оғоз гардид

ДУШАНБЕ, 13.08.2026 /АМИТ «Ховар»/. Имрӯз дар Вазорати рушди иқтисод ва савдои Ҷумҳурии Тоҷикистон оид ба оғози татбиқи лоиҳаи «Тақвияти рақамикунонии вазифаҳои давлатии Ҷумҳурии Тоҷикистон» ҳамоиш доир гардид.

Тавре ба АМИТ «Ховар» аз ин вазорат хабар доданд, лоиҳа дар ҳамкорӣ бо Агентии ҳамкории байналмилалии Корея (KOICA) амалӣ шуда, ҳадафи он тақвияти равандҳои рақамикунонӣ, аз ҷумла рақамикунонии бизнес-равандҳои Вазорати рушди иқтисод ва савдои Ҷумҳурии Тоҷикистон мебошад.

Муовини Вазири рушди иқтисод ва савдои Ҷумҳурии Тоҷикистон Аҳлиддин Нуриддинзода иброз дошт, ки татбиқи ин лоиҳа метавонад барои такмили идоракунии давлатӣ, баланд бардоштани самаранокии равандҳои корӣ ва истифодаи васеи технологияҳои рақамӣ дар фаъолияти Вазорати рушди иқтисод ва савдо заминаи мусоид фароҳам оварад.

Директори Дафтари Агентии ҳамкории байналмилалии Корея (KOICA) Канг Сонг Ҳун омодагии ин ниҳодро барои дастгирии раванди рақамикунонии бизнес-равандҳои Вазорати рушди иқтисод ва савдо иброз намуд.

Таъкид шуд, ки оғози расмии татбиқи лоиҳа, ҷалби мутахассисони соҳавӣ дар самти таҳкими ҳамкории дуҷониба ва ноил шудан ба ҳадафҳои муштараки пешбинишуда қадами муҳим мебошад

АКС: Вазорати рушди иқтисод ва савдои Ҷумҳурии Тоҷикистон