Дастовардҳои соҳаи маориф дар солҳои Истиқлолияти давлатӣ дар шаҳри Ҳисор баррасӣ шуданд

ДУШАНБЕ, 26.08.2026 /АМИТ «Ховар»/. «Дастовардҳои замони Истиқлолияти давлатии Ҷумҳурии Тоҷикистон»-таҳти чунин унвон дар шаҳри Ҳисор бахшида ба 35-солагии Истиқлоли давлатии Ҷумҳурии Тоҷикистон ҳамоиш баргузор гардид.

АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад, ки дар ҳамоиш вакили Маҷлиси намояндагони Маҷлиси Олии Ҷумҳурии Тоҷикистон Сурайё Дӯстмуродзода, роҳбарияти шаҳри Ҳисор, кормандони соҳаи маориф, роҳбарони муассисаҳои таълимӣ, директорони муассисаҳои таҳсилоти миёнаи умумӣ ва дигар масъулони соҳа иштирок намуданд.

Гуфта шуд, ки Истиқлолияти давлатӣ барои рушди тамоми соҳаҳои ҳаёти ҷомеа, аз ҷумла соҳаи маориф заминаи мусоид фароҳам овард. Давоми солҳои соҳибистиқлолӣ дар самти бунёду навсозии муассисаҳои таълимӣ, баланд бардоштани сатҳи таълиму тарбия, беҳтар намудани шароити фаъолияти омӯзгорон ва фароҳам овардани имконияти нави таҳсил барои насли ҷавон корҳои назаррас ба анҷом расонида шуданд.

Вакили Маҷлиси намояндагон Сурайё Дӯстмуродзода оид ба дастовардҳои Ҷумҳурии Тоҷикистон дар даврони соҳибистиқлолӣ, нақши Истиқлолияти давлатӣ дар рушди соҳаҳои иҷтимоӣ, бахусус маориф ва саҳми омӯзгорон дар тарбияи насли соҳибмаърифат сухан гуфт.

Дар ҳамоиш ҳамчунин оид ба аҳамияти ҳифзи дастовардҳои даврони соҳибистиқлолӣ, баланд бардоштани ҳисси ватандӯстӣ ва масъулияти шаҳрвандии ҷавонон табодули назар карда шуд.

Дар идома оид ба масъалаҳои мубрами соҳаи маориф ва нақши омӯзгорон дар пешрафти ҷомеа мубодилаи афкор доир гардид.

АКС: Мақомоти иҷроияи ҳокимияти давлатии шаҳри Ҳисор