«ЭЪЛОМИЯИ ҲУҚУҚИ БАШАР». Таҳти чунин унвон ҳамоиши ҷумҳуриявӣ доир гардид

ДУШАНБЕ, 05.08.2026 /АМИТ «Ховар»/. 4 авуст дар ноҳияи Варзоб таҳти унвони ««Эъломияи ҳуқуқи башар»-и Куруши Кабир ва тарғиби масъалаҳои ҳамзистии осоишта дар он» ҳамоиши ҷумҳуриявӣ баргузор гардид. Дар ин хусус АМИТ «Ховар» бо истинод ба Ҳаракати ваҳдати миллӣ ва эҳёи Тоҷикистон иттилоъ медиҳад.

Раиси Кумитаи иҷроияи Ҳаракати ваҳдати миллӣ ва эҳёи Тоҷикистон Рудобаи Мукаррам иброз дошт, ки «Эъломияи ҳуқуқи башар»-и Куруши Кабир аз муҳимтарин осори тамаддуни башарӣ буда, дар он арзишҳои инсондӯстӣ, таҳаммулгароӣ, эҳтиром ба озодии инсон ва адолат таҷассум ёфтаанд.

Омӯзиш ва муаррифии чунин мероси ғании таърихӣ барои таҳкими худшиносии миллӣ, тарбияи ҷавонон дар руҳияи ватандӯстӣ ва эҳтиром ба арзишҳои умумибашарӣ аҳаммияти калон дорад. Сиёсати сулҳпарваронаи Ҷумҳурии Тоҷикистон таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон идомаи мантиқии ҳамин арзишҳои таърихӣ буда, барои таҳкими сулҳу ваҳдат ва ҳамзистии осоишта заминаи устувор фароҳам овардааст.

Дар ҷараёни ҳамоиш Раиси ноҳияи Варзоб Хусрав Дамонзода гуфт, ки баргузории чунин ҳамоишҳо барои баланд бардоштани маърифати таърихӣ ва ҳуқуқии ҷомеа, таҳкими худшиносии миллӣ ва тарғиби арзишҳои инсонпарварона аҳаммияти бузург дорад. Мероси Куруши Кабир на танҳо бахше аз таърихи тамаддуни башар, балки намунаи арҷгузорӣ ба ҳуқуқу озодиҳои инсон ва ҳамзистии осоишта мебошад.

Иштирокчиён доир ба аҳаммияти таърихию фарҳангии Эъломияи Куруши Кабир, арзишҳои башардӯстонаи дар он таҷассумёфта ва нақши онҳо дар таҳкими фарҳанги сулҳ, таҳаммулгароӣ ва эҳтиром ба ҳуқуқу озодиҳои инсон мубодилаи афкор намуданд.

АКС: Кумитаи иҷроияи Ҳаракати ваҳдати миллӣ ва эҳёи Тоҷикистон