«ФЕСТИВАЛИ ТОБИСТОНАИ ДУШАНБЕ-2026»: Пойтахти Тоҷикистон ба муносибати 35-солагии Истиқлоли давлатӣ мизбони ҷашни фарҳангиву фароғатӣ гардид

ДУШАНБЕ, 23.08.2026 /АМИТ «Ховар»/. Ба муносибати 35-солагии Истиқлоли давлатии Ҷумҳурии Тоҷикистон 22 август дар Муассисаи давлатии «Наврӯзгоҳ»-и шаҳри Душанбе бо иштироки сокинону меҳмонони пойтахт ва сайёҳони хориҷӣ «Фестивали тобистонаи Душанбе – 2026» («Dushanbe Summer Fest – 2026») оғоз гардид, ки имрӯз, 23 август низ идома меёбад. Дар ин хусус ба АМИТ «Ховар» аз Раёсати рушди сайёҳии Мақомоти иҷроияи ҳокимияти давлатии шаҳри Душанбе хабар доданд.

Фестивал бо дастгирии Мақомоти иҷроияи ҳокимияти давлатии шаҳри Душанбе аз ҷониби Ҷамъияти дорои масъулияти маҳдуди «Бозоршинос» гузаронида мешавад.

Ҳадаф аз баргузории фестивал рушди соҳаи сайёҳӣ, фароҳам овардани шароити мусоиди истироҳату фароғат барои сокинону меҳмонони пойтахт, ҷалби сайёҳони хориҷӣ, муаррифии имкониятҳои сайёҳию фарҳангии шаҳри Душанбе ва дастгирии ташаббусҳои бахши хусусӣ мебошад.

Дар рӯзи аввали фестивал дар ҳудуди «Наврӯзгоҳ» барномаи гуногуни фарҳангӣ, фароғатӣ ва сайёҳӣ доир гардид. Меҳмонон аз намоиш ва фурӯши маҳсулоти ҳунарҳои мардумӣ, таом ва хӯришҳои миллӣ ва байналмилалӣ, шириниҳою нӯшокиҳои гуногун, бозиҳои варзишиву зеҳнӣ, озмуну викторинаҳо, намоишҳои театриву сиркӣ, сайру гашт тавассути асп ва дигар барномаҳои фароғатӣ баҳравар шуданд.

Барномаи асосии фестивал бо суханронии муовини Раиси шаҳри Душанбе Дилбар Одилзода оғоз ёфта, зимни он аҳамияти баргузории чунин чорабиниҳо дар рушди сайёҳӣ, муаррифии имкониятҳои фарҳангиву фароғатии пойтахт ва ҷалби бештари меҳмонону сайёҳон таъкид гардид.

Қисмати фарҳангии чорабинӣ бо барномаи консертӣ идома ёфт. Дар он сарояндагони маъруфи эстрадаи тоҷик ва хориҷӣ бо иҷрои сурудҳои машҳур ба иштирокчиёни фестивал руҳияи идона бахшиданд.

««Фестивали тобистонаи Душанбе – 2026» яке аз чорабиниҳои муҳими фарҳангиву фароғатӣ буда, барои муаррифии фарҳанги миллӣ, ҳунарҳои мардумӣ, имкониятҳои сайёҳӣ ва рушди хизматрасонӣ дар пойтахт замина фароҳам меорад», — шарҳ доданд аз Раёсати рушди сайёҳии пойтахт

Барномаи фестивал 23 август низ дар Муассисаи давлатии «Наврӯзгоҳ» идома ёфта, барои сокинону меҳмонон барномаи рангини фарҳангиву фароғатӣ ва консерти бошукӯҳ бо иштироки ҳунармандони маъруфи эстрадаи тоҷик ва хориҷӣ пешниҳод мегардад.

Ёдовар мешавем, ки «Фестивали тобистонаи Душанбе» солҳои қабл низ ҳамчун яке аз чорабиниҳои маъруфи фарҳангиву фароғатии пойтахт баргузор шуда, сокинону меҳмонони зиёдеро ба ҳам овардааст. Он қаблан бо дастгирии Мақомоти иҷроияи ҳокимияти давлатии шаҳри Душанбе солҳои 2018, 2019 ва 2021 баргузор гардида буд.

АКС: Раёсати рушди сайёҳии Мақомоти иҷроияи ҳокимияти давлатии шаҳри Душанбе