Хадамоти алоқа: «Аз харидорӣ, насб ва истифодаи худсаронаи репитерҳои ғайристандартӣ ва бе танзими касбӣ худдорӣ намоед»

ДУШАНБЕ, 10.08.2026 /АМИТ «Ховар»/. Дар шаш моҳи соли 2026 мутахассисони Хадамоти алоқаи назди Ҳукумати Ҷумҳурии Тоҷикистон дар 123 истгоҳи базавии операторони алоқаи мобилӣ радиохалалҳоро ошкор ва бартараф намуданд.

Тавре ба АМИТ «Ховар» аз ин хадамот хабар доданд, санҷишҳои гузаронида нишон медиҳанд, ки моҳҳои охир ҳолатҳои насб ва истифодаи нодуруст ё ғайриқонунии репитерҳо (тақвиятдиҳандаҳои сигнали алоқаи мобилӣ) афзоиш ёфтааст. Ба иттилои манбаъ, истифодаи худсаронаи репитерҳо, махсусан таҷҳизоти ғайристандартӣ ва нодуруст танзимшуда метавонад ба фаъолияти муътадили шабакаҳои алоқаи мобилӣ халал расонад.

Репитери нодуруст насбшуда метавонад дар басомадҳои истифодашавандаи операторони мобилӣ интерференсия ба вуҷуд оварда, боиси паст гардидани сифати зангҳои телефонӣ, коҳиш ёфтани суръати интернет, қатъшавии пайвастшавӣ ва дар маҷмуъ бад шудани сифати хизматрасонӣ барои муштариёни минтақа гардад.

Истифодаи таҷҳизоти ғайристандартӣ ба фаъолияти истгоҳҳои базавии операторони мобилӣ таъсири манфӣ расонида, сатҳи радиохалалҳоро зиёд менамояд. Дар баъзе ҳолатҳо чунин халалҳо метавонанд ба фаъолияти дигар воситаҳо ва системаҳои радиоэлектронӣ низ таъсир расонанд.

Бояд гуфт, ки истифодаи спектри радиобасомадҳо тибқи талаботи қонунгузории Ҷумҳурии Тоҷикистон ва санадҳои меъёрии ҳуқуқии соҳаи алоқа ба танзим дароварда мешавад. Аз ин рӯ, насб ва истифодаи таҷҳизоти радиоэлектронӣ бояд бо риояи талаботи техникию ҳуқуқии муқарраргардида анҷом дода шавад.

Ҳангоми ба вуҷуд омадани радиохалалҳо мутахассисон барои муайян намудани манбаи он ченкуниҳои махсус анҷом дода, барои бартараф намудани сабабҳои халал тадбирҳои зарурӣ меандешанд.

Хадамоти алоқаи Тоҷикистон шаҳрвандонро даъват менамояд, ки аз харидорӣ, насб ва истифодаи худсаронаи репитерҳои номаълум, ғайристандартӣ ва бе танзими касбӣ худдорӣ намоянд.

Дар ҳолати ошкор гардидани фурӯш, насб ё истифодаи ғайриқонунии чунин таҷҳизот нисбат ба шахсони воқеӣ, соҳибкорони инфиродӣ ва шахсони ҳуқуқӣ тибқи талаботи Кодекси ҳуқуқвайронкунии маъмурии Ҷумҳурии Тоҷикистон тадбирҳои дахлдори маъмурӣ андешида мешаванд.

Ба шаҳрвандон тавсия дода мешавад, ки дар ҳолати паст гардидани сатҳ ва сифати алоқаи мобилӣ ё интернет ба оператори мобилии хизматрасон муроҷиат намоянд.

Хадамоти алоқа таъкид менамояд, ки истифодаи репитер танҳо дар ҳолате бояд анҷом дода шавад, ки таҷҳизот ба талаботи техникии муқарраргардида ҷавобгӯ бошад. Насбу танзими он тибқи тартиби муайяншуда бояд аз ҷониби мутахассисони соҳибихтисос анҷом дода шавад.

АКС: Хадамоти алоқаи назди Ҳукумати Ҷумҳурии Тоҷикистон