Хонандагони Тоҷикистон дар Олимпиадаи байналмилалии муҳандисӣ-кайҳонӣ сазовори ҷойи дуюм шуданд

ДУШАНБЕ, 20.08.2026 /АМИТ «Ховар»/. Аз 13 то 18 августи соли 2026 дар шаҳри Пекини Ҷумҳурии Мардумии Чин Олимпиадаи байналмилалии муҳандисӣ-кайҳонии Global Future Space Scholars Meet — GFSSM 2026 баргузор гардид, ки дар он хонандагони Литсейи инноватсионии «Ҷавонӣ»-и шаҳри Хуҷанд аз рӯйи 3 бахш ғолиб омада, мақоми дуюмро соҳиб гардиданд.

Тавре ба АМИТ «Ховар» аз Мақомоти иҷроияи ҳокимияти давлати шаҳри Хуҷанд иттилоъ доданд, дастаи хонандагони Литсейи инноватсионии «Ҷавонӣ» ҳамчунин дар номинатсияи «Беҳтарин даста дар самти муҳандисӣ» ғолиб дониста шуда, бо Ҷоми махсуси олимпиада қадрдонӣ карда шуд. Олимпида бо забони англисӣ доир шуда, дар баробари донистани фанҳои дақиқ ҳамчунин хуб донистани забони англисиро талаб мекунад.

Дар олимпиада 50 намояндаи давлатҳои гуногуни ҷаҳон иштирок намуда, аз рӯи самтҳои физика, астрофизика, илмҳои кайҳонӣ, муҳандисӣ ва технологияҳои муосир дониш, тафаккури илмӣ ва маҳорат санҷиданд.

Олимпиадаи ҷаҳонии муҳандисӣ — кайҳонӣ GFSSM 2026 майдони бузурги илм, физика, астрофизика, муҳандисӣ, технология ва кайҳон маҳсуб мешавад. Дар он иштирокчиён дар бахши назариявӣ, ҳалли мисолу масъалаҳо ва омодасозии лоиҳаи муҳандисӣ дониш месанҷанд.

Олимпиадаи ҷаҳонии муҳандисӣ- кайҳонии GFSSM 2026 бо ташаббус ва ҳамкории сохторҳои бонуфузи байналмилалии соҳаи кайҳон, аз ҷумла Бунёди кайҳонии Чин, Бунёди кайҳонии ИМА, Академияи миллии кайҳонии Британияи Кабир
давоми 8 сол аст, ки баргузор мегардад.
Идораи миллии аэронавтика ва фазои кайҳонии Иёлоти Муттаҳидаи Амрико (NASA), Идораи миллии кайҳонии Чин (CNSA) ва Корпоратсияи давлатии фаъолияти кайҳонии Федератсияи Русия (Роскосмос) шарикони ҳамкори ин олимпиада маҳсуб мешаванд.

Тоҷикистон бори аввал вориди майдони GFSSM гардида, нахустин иштирокашро бо мақоми дуюм ва Ҷоми «Беҳтарин даста» ҷамъбаст намуд.

АКС: Мақомоти иҷроияи ҳокимияти давлати шаҳри Хуҷанд