Лагери истироҳатию солимгардонии «Саодат» 360 кӯдакро ба истироҳат фаро гирифт

ДУШАНБЕ, 02.08.2026 /АМИТ «Ховар»/. Дар лагери истироҳатию солимгардонии кӯдаконаи «Саодат», ки дар Ҷамоати деҳоти Поршиневи ноҳияи Шуғнон ҷойгир аст, имсол дар се давр 360 кӯдак ба истироҳату фароғат фаро гирифта шуданд. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Шуғнон хабар доданд.

Ҳамасола дар ин истироҳатгоҳ бо мақсади баланд бардоштани маърифати кӯдакон, рушди ҷаҳонбинӣ ва ташаккули тарзи ҳаёти солим чорабиниҳои гуногуни фарҳангӣ, маърифатӣ ва варзишӣ баргузор мегарданд. Аз ҷумла, намоиши филмҳои тарбиявӣ, машғулияти омӯзишӣ оид ба риояи қоидаҳои гигиенаи шахсӣ, мусобиқаҳои варзишӣ ва бозиҳои солимгардонӣ ба таври мунтазам доир карда мешаванд.

Инчунин ба хотири рушди истеъдод ва қобилияти эҷодии наврасон маҳфилҳои рассомӣ ташкил гардида, дар доираи иқдоми ҷумҳуриявии «Тоҷикона мепӯшем» барои эҳтироми либоси миллӣ, фарҳанг ва анъанаҳои мардумӣ корҳои тарғиботӣ гузаронида мешаванд.

Машқҳои пагоҳирӯзӣ, ки яке аз бахшҳои муҳими реҷаи ҳаррӯзаи лагер ба ҳисоб мераванд, ба таҳкими саломатӣ ва тарбияи ҷисмонии кӯдакон мусоидат менамоянд. Ҳамзамон бо мақсади шиносоии истироҳаткунандагон бо таъриху фарҳанги минтақа ба мавзеъҳои таърихию сайёҳии ноҳияи Шуғнон саёҳатҳо ташкил карда мешаванд.

Иттилоъ дода шуд, ки бо мақсади боз ҳам беҳтар намудани шароити истироҳат ва фароҳам овардани имконияти қабули шумораи бештари кӯдакон сохтмони бинои нави лагери «Саодат» оғоз гардидааст. Бунёди ин иншоот ба баланд бардоштани сатҳи хизматрасонӣ ва муҳайё намудани шароити замонавии истироҳатӣ барои наврасон мусоидат менамояд.

АКС: Мақомоти иҷроияи ҳокимияти давлатии ноҳияи Шуғнон