Муовини Сарвазири Тоҷикистон бо корҳои саҳроӣ ва таъмини оби полезӣ дар ноҳияи Зафаробод шинос шуд

ДУШАНБЕ, 05.07.2026 /АМИТ «Ховар»/. Муовини Сарвазири Ҷумҳурии Тоҷикистон Сулаймон Зиёзода бо гурӯҳи кории Ҳукумати Ҷумҳурии Тоҷикистон бо корҳои саҳроӣ, фаъолияти истгоҳҳои обкашӣ ва таъмини заминҳо бо оби полезӣ дар ноҳияи Зафаробод шинос шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Зафаробод хабар медиҳад, ки Сулаймон Зиёзода бо кишоварзон ва масъулони соҳа оид ба истифодаи оқилонаи оби полезӣ, баланд бардоштани ҳосилнокии зироат, вусъат бахшидани кишти такрорӣ ва татбиқи технологияҳои инноватсионӣ суҳбат намуд.

Татбиқи сиёсати аграрии мамлакат зери таваҷҷуҳи доимии Президенти Ҷумҳурии Тоҷикистон муҳтарам Эмомалӣ Раҳмон қарор дошта, истифодаи самараноки замину об, риояи корҳои агротехникӣ ва рушди соҳаи кишоварзӣ омилҳои асосии таъмини фаровонии бозори истеъмолии дохилӣ ва афзун намудани ҳаҷми содироти маҳсулот ба ҳисоб мераванд.

Муовини Сарвазири Тоҷикистон инчунин бо ҳолати агрегатҳои обкашии силсилапойгоҳҳои «Қизилӣ-1», «Қизилӣ-2», «Қизилӣ-3», «Қизилӣ-4», «Мирзочӯл-1» ва «Мирзочӯл-2» шинос шуд.

Сулаймон Зиёзода дар хоҷагиҳои хоҷагиҳои деҳқонии «Ҳамза» ва «Камола» бо нашъунамои пахта ва дигар зироат шинос гардид.

Муовини Сарвазири Тоҷикистон саҳми деҳқонони ноҳияи Зафарободро дар таъмини амнияти озуқавории мамлакат муҳим арзёбӣ намуд. Ба кишоварзони ноҳия  барои боз ҳам беҳтар намудани нишондиҳандаҳои истеҳсолӣ барои истифодаи оқилонаи замин, фаровон гардидани ҳосил ва гирифтани ду-се ҳосил  аз як замин тавсия дода шуд.

Таъкид гардид, ки иҷрои саривақтии тадбирҳои агротехникӣ, истифодаи оқилонаи захираҳои обу замин ва амалӣ намудани таҷрибаҳои пешқадами кишоварзӣ омили асосии ба даст овардани ҳосили фаровон ва рушди минбаъдаи соҳаи пахтакорӣ ба ҳисоб меравад.

АКС: Мақомоти иҷроияи ҳокимияти давлатии ноҳияи Зафаробод