Нақшаи қисми даромади буҷети маҳаллии шаҳри Ҳисор дар нимсолаи якуми соли 2026 сад фоиз иҷро шуд
ДУШАНБЕ, 15.08.2026 /АМИТ «Ховар»/. Нақшаи қисми даромади буҷети маҳаллии шаҳри Ҳисор дар нимсолаи якуми соли 2026 қариб 170 миллион сомонӣ ё 100 фоиз иҷро гардид, ки нисбат ба нақша 62 ҳазор сомонӣ зиёд аст. Дар ин хусус Раиси шаҳри Ҳисор Ҷаббор Носирзода дар нишасти матбуотӣ ба намояндагони расонаҳои хабарӣ иттилоъ дод.
Гуфта шуд, ки нақшаи қисми даромади буҷети маҳаллии шаҳри Ҳисор дар давраи ҳисоботӣ беш аз 169 миллиону 415 ҳазор сомонӣ пешбинӣ шуда буд. Қисми хароҷоти буҷети шаҳр 90,7 фоиз иҷро гардидааст. Нақшаи нимсолаи якуми соли равон 237,3 миллион сомонӣ муқаррар шуда, аз ҳисоби буҷет 215,4 миллион сомонӣ маблағгузорӣ гардидааст.
Бо дахли бақияи қарзи андозҳо гуфта шуд, ки ба ҳолати 1 июли соли 2026 маблағи бақияи қарзи андозҳо 38 миллиону 621 ҳазор сомониро ташкил дода, қарздории мазкур нисбат ба аввали соли 2026 15 миллиону 162,7 ҳазор сомонӣ (ба ҳолати 1 июни 2026 дар ҳаҷми 42 миллиону 645 ҳазор сомонӣ) зиёд гардидааст.
Зимни натиҷагирӣ аз фаъолияти соҳаҳои гуногуни иқтисодии шаҳр Раиси шаҳри Ҳисор гуфт, ки дар ин давра дар шаҳри Ҳисор 7 лоиҳаи давлатии сармоягузорӣ амалӣ гардида истодааст, ки маблағи умумии дар доираи онҳо азхудшуда зиёда аз 7,4 миллион доллари амрикоиро ташкил медиҳад. Тибқи тартиб мониторинги «Барномаи рушди иҷтимоию иқтисодии шаҳри Ҳисор барои солҳои 2021-2026» ба роҳ монда шуда, татбиқи самаранокии он иҷрои ҳадафҳои афзалиятнокро таъмин мекунад.
«Барномаи рушди иҷтимоию иқтисодии шаҳри Ҳисор барои солҳои 2021 – 2026» аз 2071 лоиҳа ва маблағи умумии 1 миллиарду 970 миллиону 417 ҳазор сомонӣ иборат буда, тибқи мониторинги гузаронида дар 1239 банд корҳо ба анҷом расидаанд. Оғози 364 банд ба роҳ монда шуда, шумораи 468 банд дар марҳилаи анҷомёбӣ қарор дорад, ки то охири сол ба истифода дода мешаванд. Ҷамъи маблағи ҷалбгардида беш аз 1,3 миллиард сомониро ташкил менамояд, ки ба 68,6 фоизи маблағи умумии «Барномаи рушди иҷтимоию иқтисодии шаҳри Ҳисор барои солҳои 2021 – 2026» баробар аст.
Марзия САИДЗОДА,
АМИТ «Ховар»
АКС: АМИТ «Ховар»
Муҳаммад Ҳасан Асадӣ бо фаъолият ва имконоти технологӣ ва инфрасохтории «Шаҳри ҳушманд» шинос шуд
Тоҷикистон ҳамкориро дар самти рақамикунонӣ бо Фонди Авруосиёии субот ва рушд таҳким мебахшад
Дар ноҳияи Ашт неругоҳи офтобӣ ба истифода дода мешавад
НИШАСТИ МАТБУОТӢ. Дар Сангвор 854 субъекти соҳибкории инфиродӣ фаъолият менамояд
Дар Вазорати рушди иқтисод ва савдои Тоҷикистон рақамикунонии бизнес-равандҳо оғоз гардид
ЭНЕРГИЯИ «САБЗ». Дар корхонаҳои саноатӣ ва дигар иншооти вилояти Хатлон панелҳои офтобӣ насб карда мешаванд
НИШАСТИ МАТБУОТӢ. Дар Бадахшон дар шаш моҳ 25 корхонаю коргоҳи истеҳсолӣ ба истифода дода шуд
«НАҚЛИЁТИ «ҲУШМАНД»». Дар Душанбе ҷаласаи гурӯҳи кории татбиқи лоиҳаи рушди ин намуди нақлиёт баргузор гардид
Сохтмони зеристгоҳи барқии 110/10 кВ-и Варзишгоҳи миллӣ босуръат идома дорад
Дар нахустин Форуми маъданҳои муҳими Тоҷикистону Корея дар Сеул иқтидори маъдании Тоҷикистон муаррифӣ гардид
«КАРТОТЕКА». Вазорати нақлиёти Тоҷикистон ба низоми нави рақамии баҳисобгирии маблағу воситаҳо мегузарад
Дар шаш моҳ беш аз 930 ҳазор сайёҳи дохилию хориҷӣ мавзеъҳои сайёҳии Хатлонро тамошо намуданд
