НИШАСТИ МАТБУОТӢ. Дар ноҳияи Ҷалолиддини Балхӣ ҳаҷми маҳсулоти кишоварзӣ ба беш аз 1,2 миллиард сомонӣ расонида шуд

ДУШАНБЕ, 06.08.2026 /АМИТ «Ховар»/. Дар шаш моҳи соли 2026 дар ноҳияи Ҷалолиддини Балхӣ ҳаҷми умумии маҳсулоти кишоварзӣ ба 1 миллиарду 267 миллиону 141 ҳазору 100 сомонӣ расонида шуд, ки нисбат ба ҳамин давраи соли 2025 110,5 фоиз зиёд мебошад. Дар ин хусус 5 август зимни нишасти матбуотӣ Раиси ноҳияи Ҷалолиддини Балхӣ Рустам Холиқзода иттилоъ дод.

Иброз гардид, ки кишоварзони ноҳия бо истифодаи самараноки замину об ва татбиқи усулҳои муосири агротехникӣ имконияти мавҷударо дуруст истифода бурда, дар рушди соҳаҳои пахтакорӣ, растанипарварӣ ва чорводорӣ ба натиҷаҳои назаррас ноил шудаанд.

Дар мавсими кирмакпарварии соли равон дар ноҳия беш аз 23,3 тонна пилла ҷамъоварӣ гардид, ки 105,3 фоизи нақшаи пешбинишударо ташкил медиҳад. Ин нишондиҳанда аз иҷрои босифати уҳдадориҳо ва саҳми арзандаи кирмакпарварони ноҳия дар рушди соҳа шаҳодат медиҳад.

Дар доираи нақшаи чорабиниҳо бахшида ба ҷашни 35-солагии Истиқлоли давлатии Ҷумҳурии Тоҷикистон дар ноҳия бунёди 340 биною иншооти таъйиноти гуногун пешбинӣ гардидааст. То имрӯз 369 иншоот ба истифода дода шудааст, ки аз иҷрои барзиёди нақша шаҳодат медиҳад.

АКС: Мақомоти иҷроияи ҳокимияти давлатии ноҳияи Ҷалолиддини Балхӣ