НИШАСТИ МАТБУОТӢ. Дар ноҳияи Носири Хусрав фарогирии кӯдакон ба муассисаи томактабӣ 3,2 фоиз зиёд гардидааст

ДУШАНБЕ, 10.08.2026 /АМИТ «Ховар»/. Дар ноҳияи Носири Хусрави вилояти Хатлон 32 муассисаи таълимӣ фаъолият менамояд, ки дар он 12 ҳазору 777 хонанда бо таҳсил фаро гирифта шудааст. Инчунин дар шаш муассисаи томактабӣ 260 кӯдак таълиму тарбия гирифта, фарогирии кӯдакон нисбат ба соли 2025 3,2 фоиз зиёд мебошад. Дар ин хусус зимни ниашсти матбуотӣ Маҳмадаюб Шарифзода, Раиси ноҳияи Носири Хусрав иттилоъ дод.

Дар назди 25 муассисаи таълимӣ 57 синфи маркази инкишофи нутқи кӯдак ташкил карда шуда, 1861 кӯдак ба таълиму тарбияи томактабӣ фаро гирифта шудаанд.

Иттилоъ дода шуд, ки аз ноҳия ба хориҷи мамлакат 1100 тонна пиёз содирот карда шуд, ки 65 фоизи нақшаи солонаро ташкил медиҳад. Пиёз маҳсулоти асосии содиротӣ буда, дар ноҳия ба парвариши он аҳамияти зарурӣ дода мешавад.

Дар ноҳия дар 1924 гектар кишти такрорӣ пешбинӣ гардида, иҷрои дурнамо 100 фоизи нақшаро дар бар мегирад. Аз ҷумла, ғалладонагиҳо 976 гектар, сабзавот 240 гектар, полезиҳо 310 гектар, картошка 20 гектар, зироати техникӣ 130 гектар ва ҷуворимакка барои дон 248 гектарро ташкил медиҳад.

АКС: АМИТ «Ховар»