Озмуни ҷумҳуриявии «Таҳияи Платформаи рақамии тиҷоратикунонии натиҷаҳои фаъолияти илмӣ ва илмию техникӣ» ҷамъбаст гардид

ДУШАНБЕ, 05.08.2026 /АМИТ «Ховар»/. Дар Агентии инноватсия ва технологияҳои рақамии назди Президенти Ҷумҳурии Тоҷикистон бахшида ба ҷашни 35-солагии Истиқлоли давлатии Ҷумҳурии Тоҷикистон Озмуни ҷумҳуриявии «Таҳияи Платформаи рақамии тиҷоратикунонии натиҷаҳои фаъолияти илмӣ ва илмию техникӣ» баргузор гардид.

АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад, ки дар озмун 15 довталаб аз муассисаҳои таҳсилоти миёнаи умумӣ, муассисаҳои таҳсилоти олӣ ва ширкатҳои технологӣ иштирок намуданд. Онҳо лоиҳаҳояшонро оид ба ташкили платформаи рақамии тиҷоратикунонии натиҷаҳои фаъолияти илмӣ ва илмию техникӣ муаррифӣ карданд.

Комиссияи озмун пешниҳодҳои иштирокдоронро тибқи меъёрҳои муқарраршуда, аз ҷумла сатҳи навоварӣ, асоснокии техникӣ, имконияти татбиқи амалӣ ва дурнамои тиҷоратикунонии лоиҳаҳо мавриди арзёбӣ қарор дод.

Тибқи натиҷаҳои баҳодиҳӣ, ҷойи якум насиби номзади илмҳои техникӣ ва докторанти Донишгоҳи миллии Тоҷикистон Файзуллоҷон Гуреззода гардид. Ба ҳама довталабони озмун барои иштироки фаъолона ва саҳмгузорӣ дар рушди муҳити инноватсионӣ раҳматномаҳои Агентӣ тақдим карда шуданд.

Баргузории чунин озмунҳо ба рушди экосистемаи инноватсионии кишвар, ҳавасмандгардонии фаъолияти илмӣ ва илмӣ-техникӣ, тиҷоратикунонии натиҷаҳои таҳқиқот, таҳкими робитаи илм бо истеҳсолот ва пешбурди иқтисоди рақамии Ҷумҳурии Тоҷикистон мусоидат менамояд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон