РУШДИ САНОАТ ДАР 35 СОЛИ ИСТИҚЛОЛИ ТОҶИКИСТОН. Дар Бадахшон беш аз сад корхона ва коргоҳи хурди саноатӣ фаъолият менамояд

ДУШАНБЕ, 22.08.2026 /АМИТ «Ховар»/. Тибқи иттилои Агентии омори назди Президенти Ҷумҳурии Тоҷикистон, дар Вилояти Мухтори Кӯҳистони Бадахшон дар панҷ соли охир шумораи корхонаю коргоҳҳои хурди саноатӣ аз 43 ба 191 адад расонида шуд. Дар ин давра зиёда аз 160 корхона ва коргоҳи нави истеҳсолӣ бунёд карда шуд.

Ҳаҷми маҳсулоти саноатӣ соли 2025 ба 336,5 миллион сомонӣ расид, ки нисбат ба соли 2020 ду маротиба бештар мебошад.

Инчунин барои рушди саноат дар «Барномаи рушди вилоят барои солҳои 2026-2030» ба истифода додани 52 лоиҳа бо маблағи умумии 3368,4 миллион сомонӣ, ки ба истихроҷ ва коркарди масолеҳи маҳаллӣ равона гардидаанд, дар назар дошта шудааст. Дар ин замина зиёда аз 1500 ҷойи нави кор  таъсис  дода мешавад.

Ҳаҷми маҳсулоти саноатӣ дар панҷ соли охир ба 336,5 миллион сомонӣ расонида шуд. Гардиши умумии мол аз 151,2 миллион сомонии соли 2020 ба 293,1 миллион сомонӣ расонида шуд, ки ин 1,9 маротиба зиёд мебошад.

Ҳаҷми гардиши савдои хориҷӣ дар вилоят ба 278,1 миллион доллари амрикоӣ расида, нисбат ба соли 2015 (13,1) 20 маротиба зиёд гардидааст. Ин нишондиҳандаҳо аз он шаҳодат медиҳанд, ки бо шарофати сиёсати ҳадафмандонаи Ҳукумати Ҷумҳурии Тоҷикистон Вилояти Мухтори Кӯҳистони Бадахшон тадриҷан ба марҳилаи нави рушди иқтисодӣ ва иштироки фаъол дар равандҳои иқтисодии миллӣ ва байналмилалӣ қадам мегузорад.

АКС: АМИТ «Ховар»