Сарвари давлат Эмомалӣ Раҳмон дар ноҳияи Шоҳмансури шаҳри Душанбе Муассисаи таҳсилоти миёнаи умумии рақами 20-ро ба истифода доданд

ДУШАНБЕ, 28.08.2026 /АМИТ «Ховар»/. 28 август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар ноҳияи Шоҳмансури пойтахт бо бардоштани парда аз рӯи лавҳаи рамзӣ бинои нави муассисаи таҳсилоти миёнаи умумии рақами 20-ро мавриди баҳрабардорӣ қарор доданд.

Бинои нави муассисаи таҳсилоти миёнаи умумии рақами 20 ба истиқболи шоиста аз ҷашни муқаддаси миллӣ — 35-солагии Истиқлоли давлатӣ бо дастгирии Мақомоти иҷроияи ҳокимияти давлатии шаҳри Душанбе бо риояи талаботи стандартҳои байналмилалӣ ва тарҳу унсурҳои муосири меъморӣ бунёд гардидааст.

Корҳои сохтмонии муассисаи таълимии мазкур давоми як сол ҷараён гирифта, инак барои солҳои таҳсили 2026-2027 омода гардид.

Ба Пешвои миллат муҳтарам Эмомалӣ Раҳмон иттилоъ дода шуд, ки ин боргоҳи илму маърифат, ки дар заминаи муассисаи таҳсилоти миёнаи умумии рақами 20-и қаблӣ бунёд карда шудааст, бо назардошти зиёдшавии аҳолӣ барои 2400 хонанда дар ду баст пешбинӣ гардидааст.

Ин муассисаи таълимӣ бо шароиту имкониятҳои васеи таълиму тарбия ва технологияи муосир таъмин гардида, дорои 58 синфхонаи барҳавои таълимию фаннӣ, 16 ҳуҷраи кории омӯзгорон, китобхона бо 90 ҷойи нишаст, китобхонаи электронӣ бо 24 ҷойи нишаст, маҷлисгоҳ бо 350 ҷойи нишаст, толори варзишӣ бо 70 ҷойи нишаст, толори тенниси руйи миз, майдончаи варзишии тобистона, ошхона бо 210 ҷойи нишаст, бунгоҳи тиббӣ ва ҳуҷраҳои техникию ёрирасон мебошад.

Дар китобхонаи муассиса 14 ҳазору 200 китоб мавҷуд аст, ки аз ин нишондиҳанда 4 ҳазору 500-тои онро асарҳои бадеии адибони классику муосир ташкил медиҳад.

Бо мавриди баҳрабардорӣ қарор гирифтани бинои нави Муассисаи таҳсилоти миёнаи умумии рақами 20-и ноҳияи Шоҳмансури шаҳри Душанбе шумораи омӯзгорони муассиса ба 90 нафар расид.

Барои фаро гирифтани хонандагон бо омӯзиши касбҳои гуногун дар муассиса синфхонаҳои касбомӯзӣ амал менамояд, ки бо шароити муосир таъмин гардидааст. Ин тадбир ба наврасон имкон медиҳад, ки дар баробари омӯзиши илму дониш ҳамчунин ҳунар ва касбҳои гуногунро аз худ намоянд.

Дар муассисаи мазкур ҷорӣ намудани усулҳои инноватсионӣ тақвият дода мешаванд.

Бунёди муассисаҳои нави таълимӣ дар доираи амалишавии “Стратегияи миллии рушди маориф барои давраи то соли 2030” амалӣ гардидааст.

Пешвои миллат муҳтарам Эмомалӣ Раҳмон зимни суҳбат баланд бардоштани сифати таҳсил ва дар рӯҳияи худогоҳиву ватандӯстӣ тарбия намудани кӯдакону наврасонро рисолати касбии омӯзгорон арзёбӣ намуда, таъкид доштанд, ки бо бунёди муассисаҳои нави таълимӣ ва васеъ гардидани шароити хуби таълиму тарбия, пеш аз ҳама, бояд низоми таҳсилот ба стандартҳои ҷаҳонӣ мутобиқ гардонида шуда, ба омӯзиши донишҳои муосир, фанҳои дақиқ, забонҳои хориҷӣ ва технологияҳои нав таваҷҷуҳи ҷиддӣ зоҳир карда шавад.

Давоми 35 соли соҳибистиқлолии кишвар дар ноҳияи Шоҳмансури шаҳри Душанбе 20 муассисаи нави таълимӣ бо 19 ҳазору 564 ҷойи нишаст ба истифода дода шудааст.