Тоҷикистон ба таъмини пайвастагии конфронсҳои СММ оид ба об дар солҳои 2023, 2026 ва 2028 даъват намуд

ДУШАНБЕ, 28.08.2026 /АМИТ «Ховар»/. Дар доираи Ҳафтаи ҷаҳонии об дар Стокголм муовини Вазири корҳои хориҷии Ҷумҳурии Тоҷикистон Саноӣ Бойзода дар чорабинии «Пайванди конфронсҳои СММ оид ба об дар солҳои 2023, 2026 ва 2028» иштирок намуд. Дар ин хусус ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Саноӣ Бойзода иброз намуд, ки конфронсҳои Созмони Милали Муттаҳид оид ба об дар солҳои 2023, 2026 ва 2028 бояд ҳамчун раванди ягона ва пайвастаи глобалӣ баррасӣ шаванд. «Ин раванд бояд аз қабули уҳдадориҳо ба татбиқи амалии онҳо ва аз татбиқ ба натиҷаҳои мушаххасу ченшаванда гузарад. Дар ин замина иброз гардид, ки Конфронси Созмони Милали Муттаҳид оид ба об дар соли 2026 дар Абузабӣ бояд ба татбиқи босуръати Рӯзномаи амал оид ба об (Water Action Agenda) тавассути ҷалби бештари маблағгузорӣ, истифодаи технологияҳо, таҳкими шарикӣ ва ҳисоботдиҳӣ мусоидат намояд», — гуфт Саноӣ Бойзода.

Ҳамчунин таъкид  шуд, ки Конфронси Созмони Милали Муттаҳид оид ба об дар соли 2028 дар Душанбе бояд на танҳо натиҷаҳои Даҳсолаи байналмилалии амал «Об барои рушди устувор, солҳои 2018–2028»-ро ҷамъбаст намояд, балки барои муайян намудани самтҳои ояндаи рӯзномаи ҷаҳонии об пас аз соли 2030 замина гузорад.

Дар ин робита ба ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба Чаҳорчӯбаи оби Душанбе (Dushanbe Water Framework) ишора гардид. Ҳадафи ташаббуси мазкур таъмини пайвастагӣ ва ҳамоҳангии бештари равандҳои байналмилалӣ дар соҳаи об, инчунин таҳкими ҳамкории амалӣ барои татбиқи уҳдадориҳо ва ноил шудан ба натиҷаҳои мушаххас мебошад.

АКС: Вазорати корҳои хориҷии Ҷумҳурии Тоҷикистон