Ҳамкории Тоҷикистон бо Бонки аврупоии таҷдид ва рушд баррасӣ шуд

ДУШАНБЕ, 17.09.2026 /АМИТ «Ховар»/. 15 сентябр дар шаҳри Лондони Британияи Кабир мулоқоти Вазири молияи Ҷумҳурии Тоҷикистон Файзиддин Қаҳҳорзода бо ноиби Президенти Бонки аврупоии таҷдид ва рушд Марк Боуман баргузор гардид.

Тавре АМИТ «Ховар» бо истинод ба Вазорати молияи ҷумҳурӣ хабар медиҳад, дар мулоқот масъалаҳои дар Ёддошти тафоҳум байни Вазорати молияи Ҷумҳурии Тоҷикистон ва Бонки аврупоии таҷдид ва рушд оид ба харитаи роҳи стратегии сармоягузории бисёрсола пешбинишуда мавриди баррасӣ қарор гирифтанд.

Ҷонибҳо барои боз ҳам тақвият додани ҳамкорӣ дар самти маблағгузории лоиҳаҳои афзалиятноки ҷумҳурӣ изҳори омодагӣ намуданд.

Ҳамзамон 15 сентябр Файзиддин Қаҳҳорзода бо шарик ва роҳбари самти хизматрасониҳои машваратии ширкати байналмилалии молиявии «Rothschild & Co» Стефан Шарбит мулоқот намуд. Дар вохӯрӣ ҳамкорӣ дар самти барориши минбаъдаи коғазҳои қиматноки давлатӣ ва истифодаи механизмҳои нави маблағгузории лоиҳаҳои афзалиятноки ҷумҳурӣ баррасӣ гардида, инчунин ба масъалаи беҳтар намудани рейтингҳои байналмилалии қарзии Тоҷикистон таваҷҷуҳи хосса зоҳир карда шуд.

Мусоҳибон доир ба дурнамои ҳамкории дуҷониба дар самтҳои мухталиф ибрози андеша намуда, барои таҳияи санади ҳамкорӣ ибрози омодагӣ намуданд.

АКС: Вазорати молияи Ҷумҳурии Тоҷикистон