Азим Иброҳим дар Конфронси ҷаҳонӣ доир ба мавқеи Тоҷикистон дар рушди инфрасохтори муосир сухан гуфт
ДУШАНБЕ, 17.09.2026 /АМИТ «Ховар»/. Барои Ҷумҳурии Тоҷикистон ҳамчун кишвари маҳсур дар хушкӣ ва воқеъ дар минтақаи стратегии Осиёи Марказӣ рушди инфрасохтори нақлиётӣ, таҳкими робитаҳои байналмилалӣ ва баланд бардоштани иқтидори логистикӣ аҳамияти хос дорад. Чунин иброз намуд Вазири нақлиёти Тоҷикистон Азим Иброҳим дар ҷаласаи сатҳи баланди бисёрҷонибаи Конфронси ҷаҳонӣ оид ба ҳамкорӣ дар соҳаи инфрасохтор — GICC 2026, ки бо иштироки намояндагони воломақом ва шарикони байналмилалӣ аз кишварҳои гуногуни ҷаҳон дар Сеул баргузор гардид.
АМИТ «Ховар» бо истинод ба Вазорати нақлиёти Ҷумҳурии Тоҷикистон иттилоъ медиҳад, ки дар ҳамоиш масъалаҳои муҳими рушди инфрасохтори нақлиётӣ, таҳкими ҳамбастагии байналмилалии нақлиётӣ, рушди долонҳои байналмилалии нақлиётӣ ва ҷалби сармоягузорӣ ба соҳаи инфрасохтор баррасӣ гардиданд.
Азим Иброҳим зимни суханронӣ мавқеи Тоҷикистонро оид ба аҳамияти рушди инфрасохтори муосир, боэътимод ва устувори нақлиётӣ барои рушди иҷтимоию иқтисодии кишвар ва тавсеаи робитаҳои тиҷоратию транзитӣ баён намуд. Дар ин замина, ҷонибдории Тоҷикистон аз густариши ҳамкорӣ бо давлатҳои шарик, ниҳодҳои байналмилалии молиявӣ, сармоягузорон, ширкатҳои муҳандисӣ ва бахши хусусӣ таъкид гардид. Ҳамзамон зарурати истифодаи технологияҳои муосир, рақамикунонии соҳаи нақлиёт, рушди низомҳои интеллектуалии нақлиётӣ ва татбиқи ҳуҷҷатгузории электронии нақлиётӣ муҳим арзёбӣ шуд.
Вазир инчунин ба ташаббусҳои Тоҷикистон дар пешбурди рӯзномаи байналмилалӣ оид ба ҳамбастагии нақлиётӣ ва рушди устувор ишора намуда, аз ҷумла қабули қатъномаи бо ташаббуси Тоҷикистон пешниҳодшуда дар иҷлосияи 82-юми Комиссияи иқтисодӣ ва иҷтимоии Созмони Милали Муттаҳид барои Осиё ва Уқёнуси Ором (ESCAP) дар Бангкокро таъкид намуд. Иштирок дар чунин чорабиниҳои сатҳи баланд барои Тоҷикистон ба хотири муаррифии афзалияти кишвар дар соҳаи нақлиёт, баррасии лоиҳаҳои ояндадори инфрасохторӣ ва густариши ҳамкории байналмилалӣ имконияти муҳим фароҳам меорад.
Тоҷикистон ҳамзамон барои рушди минбаъдаи ҳамкории байналмилалӣ ва татбиқи муштараки лоиҳаҳои нақлиётиву инфрасохторӣ бо шарикони хориҷӣ изҳори омодагӣ менамояд.
АКС: Вазорати нақлиёти Ҷумҳурии Тоҷикистон
Корхонаи коркарди пахтаи ноҳияи Фархор баъд аз таъмир ба истифода дода шуд
РӮЗИ ҶАҲОНИИ ПАХТА. Як килограмм нахи пахта дар бозори ҷаҳонӣ ба 16 килограмм гандум баробар аст
«БАРНОМАИ РУШДИ САЙЁҲИИ ДОХИЛӢ». Дар Тоҷикистон беш аз 400 захираи сайёҳӣ, 1000 дара, 1000 кӯл ва мавзеъҳои дигари ҷолиб мавҷуд аст
Дурнамои рушди соҳаи сохтмони Тоҷикистон дар форуми байналмилалӣ дар Екатеринбург муаррифӣ гардид
Лоиҳаи «Дастрасӣ ба бозорҳо ва мутобиқшавӣ барои чорводорӣ» татбиқ мегардад
Дар Конфронси C5+1 SI дастовардҳои Тоҷикистон дар самти рушди зеҳни сунъӣ муаррифӣ шуданд
Коршиносони БОР соҳаи нақлиёт ва логистикаро яке аз муҳаррикони рушди иқтисодиёт арзёбӣ менамоянд
Байни Тоҷикистон ва палатаҳои савдою саноати кишварҳои ИДМ густариши робитаҳои тиҷоратӣ баррасӣ гардид
Барои фурӯши неруи барқ тавассути истгоҳҳои пуркунии воситаҳои нақлиёти барқӣ талаботи нав амалӣ гардид
ИСТИҚЛОЛИЯТИ ДАВЛАТӢ. То 1 октябр дар шаҳри Кӯлоб 493 иншооти истеҳсолию иҷтимоӣ ба истифода дода шудааст
Дар Минтақаи озоди иқтисодии «Кӯлоб» бинои гузаргоҳи гумрукӣ ва чоҳи амудӣ ба истифода дода шуд
Истифодаи таҷрибаи байналмилалӣ дар самти рушди ҳудудҳои табиии махсус муҳофизатшаванда баррасӣ шуд
