Дар Беларус бахшида ба 35-солагии Истиқлолияти давлатии Тоҷикистон чорабинии тантанавӣ баргузор гардид

ДУШАНБЕ, 17.09.2026 /АМИТ «Ховар»/. Дар Ҷамъияти дӯстӣ ва робитаҳои фарҳангӣ бо кишварҳои хориҷии Ҷумҳурии Беларус чорабинии тантанавӣ бахшида ба 35-солагии Истиқлолияти давлатии Ҷумҳурии Тоҷикистон ва 30-солагии истиқрори муносибатҳои дипломатӣ байни Ҷумҳурии Тоҷикистон ва Ҷумҳурии Беларус баргузор гардид. Дар ин хусус АМИТ «Ховар» бо истинод ба Сафорати Тоҷикистон дар Беларус хабар медиҳад.

Дар чорабинӣ Сафири Фавқулода ва Мухтори Ҷумҳурии Тоҷикистон дар Ҷумҳурии Беларус, намояндагони Вазорати корҳои хориҷии Ҷумҳурии Беларус, Палатаи намояндагони Маҷлиси миллии Ҷумҳурии Беларус,  Иттифоқи нависандагони Ҷумҳурии Беларус ва доираҳои илмию фарҳангӣ, устодону донишҷӯёни тоҷику беларуси муассисаҳои таҳсилоти олӣ, инчунин намояндагони ҷамъиятҳои дӯстӣ ва робитаҳои фарҳангӣ иштирок намуданд.

Зимни чорабинӣ аҳамияти таърихии Истиқлолияти давлатии Ҷумҳурии Тоҷикистон, дастовардҳои назарраси мамлакат давоми 35 соли соҳибистиқлолӣ ва марҳилаҳои асосии рушди кишвар мавриди таваҷҷуҳ қарор гирифтанд.

Ба чорабинӣ қироати шеърҳо дар васфи Тоҷикистону Ватан  дар иҷрои донишҷӯёни тоҷик ва барномаи фарҳангӣ аз ҷониби таҳсилкунандагони Коллеҷи давлатии мусиқии шаҳри Минск ва Мактаби мусиқии бачагонаи санъати № 10 ба номи Е. Глебови шаҳри Минск ҳусну шаҳомати идона бахшид.

Иштирокчиён ба сатҳи муносибатҳои дӯстона ва ҳамкории мутақобили судманди Тоҷикистону Беларус баҳои баланд доданд. Иброз гардид, ки дар 30 соли муносибатҳои дипломатӣ робитаҳои ду кишвар дар заминаи эҳтироми мутақобил, эътимод ва манфиатҳои муштарак пайваста рушд ёфта, соҳаҳои гуногуни ҳамкориро фаро гирифтаанд.

Иштирокчиёни чорабинӣ баргузории чунин ҳамоишро омили муҳими таҳкими дӯстӣ ва ҳамдигарфаҳмӣ, густариши муколамаи фарҳангӣ ва муаррифии шоистаи таърих, фарҳанг ва анъанаҳои ғании мардуми Тоҷикистон дар Беларус арзёбӣ намуданд.

АКС: Сафорати Тоҷикистон дар Беларус