Дар Теҳрон ба муносибати 35-солагии Истиқлоли давлатии Тоҷикистон нишасти матбуотӣ доир шуд
ДУШАНБЕ, 02.09.2026 /АМИТ «Ховар»/. 1 сентябр Сафорати Ҷумҳурии Тоҷикистон дар Ҷумҳурии Исломии Эрон ба муносибати 35-солагии Истиқлоли давлатии Ҷумҳурии Тоҷикистон бо иштироки намояндагони воситаҳои ахбори оммаи Эрон нишасти матбуотӣ баргузор намуд.
Тавре АМИТ «Ховар» бо истинод ба Сафорати Тоҷикистон дар Теҳрон хабар медиҳад, дар нишаст Сафири Фавқулода ва Мухтори Ҷумҳурии Тоҷикистон дар Ҷумҳурии Исломии Эрон Низомиддин Зоҳидӣ фидокорию ҷоннисориҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро дар хомӯш кардани оташи ҷанги шаҳрвандии таҳмилӣ дар солҳои аввали истиқлол, таъмини сулҳу субот ва ваҳдати миллӣ дар Тоҷикистон, татбиқи ҳадафҳои стратегии кишвар ва густариши раванди созандагиву бунёдкорӣ давоми 35 соли Истиқлоли Тоҷикистон таъкид кард.
Ба таваҷҷуҳи хабарнигорон дастовардҳои бузурги Тоҷикистон дар даврони истиқлол дар соҳаҳои иқтисодиву иҷтимоӣ расонида шуда, нақши сиёсати хирадмандонаи фарҳангии Пешвои миллат дар таҳкими пояҳои маънавии давлатдории муосири тоҷикон, густариши худшиносии миллӣ ва тақвияти ҳофизаи таърихии миллати тоҷик шарҳу тавзеҳ дода шуд.
Дар идомаи нишаст сиёсати хориҷии дарҳои бози Пешвои миллат чун дастоварди назарраси даврони истиқлол муаррифӣ гардида, аҳамияти ибтикороти байналмилалии Президенти Тоҷикистон дар ҳалли масоил ва мушкилоти ҷаҳони муосир, бахусус дар соҳаҳои обу иқлим, муҳити зист ва муқовимат бо таҳдиду хавфҳое, ба мисли терроризму ифротгароӣ таъкид гардид.
Таваҷҷуҳи вижа ба Қатъномаи Маҷмаи Умумии Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ ба хотири наслҳои оянда (2027–2036)», ки бо пешниҳоди Пешвои миллат 25 июни соли 2026 ба тасвиб расид, зоҳир гардид. Ин ташаббус идомаи мантиқии сиёсати хориҷии Тоҷикистон дар самти тарғиби фарҳанги сулҳ, таҳкими эътимоди байналмилалӣ ва густариши ҳамкории созандаи байни давлатҳо арзёбӣ гардид.
Бахше аз нишасти матбуотӣ ба рушду тавсеаи ҳамкории мутақобили судманди Тоҷикистону Эрон бахшида шуда, равобити гуногунҷанбаи ду кишвари дӯсту ҳамзабон яке аз самараҳои Истиқлоли Тоҷикистон унвон гардид.
Дар анҷоми нишасти матбуотӣ Сафири Тоҷикистон ба саволҳои сершумори намояндагони воситаҳои ахбори оммаи эронӣ доир ба ҷанбаҳои гуногуни сиёсати дохиливу хориҷии Ҷумҳурии Тоҷикистон ва ҳамкории он бо Ҷумҳурии Исломии Эрон посух дод.
АКС: Сафорати Ҷумҳурии Тоҷикистон дар Ҷумҳурии Исломии Эрон
Сафири Тоҷикистон бо Вазири барқ, об ва энергияи таҷдидпазири Кувайт мулоқот кард
Форуми байналмилалии «Сайёҳии устувор ва мероси фарҳангӣ» дар Тоҷикистон дар расонаҳои иттилотии Аморот инъикос ёфт
Моҳи майи соли 2027 дар Душанбе Конфронси байналмилалии сатҳи баланд роҷеъ ба оғози Даҳсолаи таҳкими сулҳ баргузор мешавад
Сафири Тоҷикистон бо Вазири федералии энергетикаи Покистон мулоқот намуд
Рушди муносибатҳои дуҷонибаи Тоҷикистону Умон баррасӣ гардид
Дурнамои ҳамкории Тоҷикистон ва Кувайт дар соҳаи маориф баррасӣ шуд
Шараф Шерализода бо ҳамраисони иҷроия ва аъзои Шурои директорони Палатаи муштараки савдои Швейтсария мулоқот намуд
Дар Панҷакент иншооти иҷтимоӣ ва хизматрасонӣ ифтитоҳ гардиданд
Сафири Тоҷикистон дар Амороти Муттаҳидаи Араб дар ҷаласаи 32-юми Шурои IRENA иштирок намуд
Дар Женева чорабинии сатҳи баланд дар мавзуи «Сулҳи устувор дар Осиёи Марказӣ: сабақҳо аз Эъломияи дӯстии абадии Хуҷанд» доир шуд
Сафири Тоҷикистон дар Амрико бо тоҷикони Канада мулоқот намуд
Сироҷиддин Муҳриддин бо Сафири Арабистони Саудӣ мулоқот намуд
