Имсол кӯчаи Абдулаҳад Қаҳҳоров мавриди истифода қарор дода мешавад

ДУШАНБЕ, 02.09.2026 /АМИТ «Ховар»/. Давоми соли 2026 навсозии кӯчаи Абдулаҳад Қаҳҳоров (аз хиёбони Саъдии Шерозӣ то сарҳади ноҳияи Рӯдакӣ) ба масофаи 5,2 км ба анҷом расида, мавриди истифода қарор дода мешавад. Дар ин хусус ба АМИТ «Ховар» аз Муассисаи давлатии «Раёсати сохтмони роҳ ва кӯпрукҳо»-и Мақомоти иҷроияи ҳокимияти давлатии шаҳри Душанбе хабар доданд.

Навсозии роҳ аз хиёбони Саъдӣ Шерозӣ то даромадгоҳи ноҳияи Рӯдакӣ дар асоси Нақшаи генералии шаҳри Душанбе амалӣ гардида, барои ҳаракати воситаҳои нақлиёт, дучарха ва пиёдагардон мутобиқ ба талаботи байналмилалӣ шароит фароҳам оварда мешавад.

Дарозии роҳ 6,6 километрро ташкил намуда, аз ду самт барои воситаҳои нақлиёт 8 хати ҳаракат сохта мешавад. Дар қисматҳои алоҳидаи роҳ ду хати алоҳидаи дигар барои нақлиёти ҷамъиятӣ пешбинӣ шудааст.

Ба иттилои манбаъ, дар ин роҳ барои ҳаракати воситаҳои нақлиёт ва пиёдагардон мутобиқ ба талаботи байналмилалӣ шароит фароҳам оварда мешавад.

Дар он аввалин маротиба барои ҳаракати дучарха роҳи алоҳида ҷудо мегардад, ки аз роҳи мошингард ва пиёдагард ҷудо аст. Роҳи алоҳидаи дучархаронӣ танҳо барои истифодаи дучархаронҳо ҷудо мегардад, ки аз роҳи мошингард ва пиёдагард ҷудо мебошад. Паҳноии роҳи алоҳидаи дучархаронӣ ҳадди ақалл 1,5 метр дар назар дошта шудааст.

Ёдовар мешавем, ки 13 марти соли 2023 Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ барои навсозии кӯчаи Абдулаҳад Қаҳҳоров санги асос гузошта буданд.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон таваҷҷуҳи коргарону мутахссисонро ба иҷрои босифати корҳо ҷалб намуда, супориш доданд, ки роҳ дар муҳлати 2,5 сол мутобиқ ба стандартҳои ҷаҳонӣ сохта, ба истифода дода шавад.

Бояд таъкид намуд, ки бо сифати баланд бунёд намудани роҳҳои оҳану мошин, нақбҳо ва пулҳо барои расидан ба яке аз ҳадафҳои асосии стратегии Ҳукумати Ҷумҳурии Тоҷикистон–баромадан аз бунбасти коммуникатсионӣ муҳиму саривақтӣ мебошад.

Навсозии кӯчаи Абдулаҳад Қаҳҳоров бо сохти меъморӣ, имконияти васеи хизматрасонӣ ва зебоӣ дар Тоҷикистон дар доираи иқдомҳои шаҳрдорӣ барои иҷрои супориши Сарвари давлат барои ба шаҳри пешрафта табдил додани пойтахти мамлакат амалӣ мешавад. Сохтмони роҳ аз хиёбони Саъдӣ Шерозӣ то даромадгоҳи ноҳияи Рӯдакӣ ба фароҳам овардани шароити мусоид ҷиҳати ҳаракати воситаҳои нақлиёт ва ба меъёрҳои байналмилалӣ мутобиқ гардонидани имконияти хизматрасонӣ дар соҳаи роҳу нақлиёт мусоидат мекунад.

Зарангези ЛАТИФ,
АМИТ «Ховар»

АКС: АМИТ «Ховар»