Китоби «Тоҷикон»-и Бобоҷон Ғафуров ба забони олмонӣ нашр гардид

ДУШАНБЕ, 04.09.2026 /АМИТ «Ховар»/. Ба ифтихори 35-солагии Истиқлоли давлатии Ҷумҳурии Тоҷикистон китоби «Тоҷикон»-и Бобоҷон Ғафуров ба забони олмонӣ тарҷума гардид.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, тарҷумаи асарҳои маъруфу мондагор ба забонҳои хориҷӣ дар пайравӣ ба талошҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон баҳри эҳёи фарҳанги бостонӣ ва тамаддуни миллати тоҷик рӯи даст гирифта шудааст.

Таърихшиносону шарқшиносон аз Олмон, Британияи Кабир, Фаронса, ИМА ва Ватикан дар тақризҳои навиштаи худ тарҷумаи китобро ба забони олмонӣ, ки яке аз забонҳои муҳими илмӣ мебошад, иқдоми саривақтӣ ҳисобида, онро дар шинохти таъриху тамаддуни қадимаи миллати тоҷик нақшофар арзёбӣ кардаанд.

Таъкид шудааст, ки тарҷумаи олмонии китоби «Тоҷикон» доираҳои илмӣ ва маъхазҳои шарқшиносии кишварҳои Ғарбро боз ҳам ғанӣ гардонида, ба ташаккули афкори илмӣ нисбат ба таъриху тамаддуни тоҷикон ва дигар халкҳои минтақаи Осиёи Марказӣ мусоидат хоҳад кард.

Китоби «Тоҷикон»-и Бобоҷон Ғафуров аз ҷониби дипломати тоҷик Ғайратшо Соҳибназар ба забони олмонӣ тарҷума ва мураттаб шуда, дар нашриёти олмонии «Ферлаг Восток Берлин» ба табъ расид.

АКС: Вазорати корҳои хориҷии Ҷумҳурии Тоҷикистон